«Չորրորդ ինքնիշխանություն». Ցուցակների 661-ից մինչև1223 համարը ընդգրկված մարդկանց բոլորի անունն անխտիր Լուսինե է

Երեկ 2012 թվականի խորհրդարանական ընտրությունների ընտրողների ցուցակը՝ ըստ ընտրատարածքների, ոստիկանության կայքէջում տեղադրվեց ուշ երեկոյան: Մինչ այդ և մինչ աշխատանքային ժամի ավարտը բազմաթիվ թեկնածուների լիազոր ներկայացուցիչներ շտապեցին ընտրատարածքային ընտրական հանձնաժողովներ (ԸԸՀ)՝ վերցնելու ցուցակները: Պարզվեց, սակայն, որ ԸԸՀ-ներին տրամադրված չէին ցուցակները. անգամ տրամադրված համակարգիչները «տեղ չէին հասել» հանձնաժողովներ: Սա, ի դեպ, օրենքի կոպտագույն խախտում է, որովհետև հենց Ընտրական օրենսգիրքն է սահմանում ժամանակացույցը, համաձայն որի՝ երեկ մինչև աշխատանքային ժամի ավարտը լիազոր մարմինը պետք է ԸԸՀ-ներին տրամադրած լիներ ցուցակները: Ինչևէ:

Ժամը 18:00-ին ահազանգ ստացանք, որ Կենտրոն համայնքն ընդգրկող թիվ 9 ընտրատարածքում գտնվող տեղամասերից մեկում, մասնավորապես՝ Մայակովսկու անվան դպրոցի պատին, փակցվել են խայտառակ ցուցակներ: Շտապեցինք այնտեղ: Պարզվեց, որ ցուցակների 661-ից մինչեւ 1223 համարը ընդգրկված մարդկանց բոլորի անունն անխտիր Լուսինե է: Ընտանիքներ կան, որտեղ մարդիկ 4 աղջիկ են ունեցել և 4-ի անունն էլ Լուսինե են դրել: Մեր նկարելուց քիչ անց ահազանգ ստացանք, որ ցուցակները հանվել են պատից: «ՉԻ»-ն հրապարակում է այս խայտառակ ցուցակն ամբողջությամբ՝ մեկնաբանությունները թողնելով ընթերցողներին: