Թուրքիայում կնոջ ևս մեկ սարսափելի սպանություն է կատարվել

Թուրքիայում կնոջ ևս մեկ սարսափելի սպանություն է կատարվել. 17 տարվա ամուսինը 42-ամյա կնոջը մասնատել և նետել է աղբանոցը:

Ինչպես հաղորդում է «Արմենպրես»-ը' վկայակոչելով թուրքական ԶԼՄ-ները, դեպքը տեղի է ունեցել Ստամբուլի Սկուդար թաղամասում: 42-ամյա Թահիր Ք.-ն դիմել է ոստիկանություն' հաղորդելով, թե իր 42-ամյա կինը' Քյուբրա Ք.-ն կորել է: Ոստիկանությունը Քյուբրա Ք.-ի մասնատված դիակը հայտնաբերել է աղբանոցում: Հետաքննությունը պարզել է, որ նրան մեկ օր առաջ սպանել է ամուսինը' Թահիր Ք.-ն: Վերջինս խոստովանել է սպանությունը: Նա պատմել է, որ փետրվարի 16-ի երեկոյան տանը թեյելիս կորրցրել է վերահսկողությունը և խոհանոցային դանակով սպանել, կտոր-կտոր է արել կնոջը և շուկայի սայլակով նրա մարմնի մասերը նետել աղբանոց:

Մի քանի օր առաջ Մերսինում երկու տղամարդկանց կողմից 20-ամյա ուսանողուհուն բռնաբարելուց հետո սպանելու և մարմինն այրելու լուրը ցնցել էր Թուրքիան:

Նշելով, որ Թուրքիայում կանանց սպանությունները 31 տոկոսով աճել են՝ թուրքական DemokratHaber կայքը հայտնել է, որ Թուրքիայի մարդու իրավունքների կազմակերպության տվյալներով' 2014 թվականին այդ երկրում տղամարդկանց բռնության հետևանքով 294 կին է մահացել: Կայքը նշել է, որ Թուրքիայում յուրաքանչյուր 4 ժամում մեկ կին սեռական շահագործման է ենթարկվում կամ բռնության ենթարկվում: Այդ երկրում կանանց 38 տոկոսը կյանքի ընթացքում նվազագույնը մեկ անգամ ֆիզիկական կամ սեռական բռնության է ենթարկվում:

Ըստ կայքի' բռնության ենթարկված կանանց 89 տոկոսը որևէ պետական կառույց բողոք չի ներկայացնում: 2014 թվականին Թուրքիայում տղամարդու կողմից բռնության են ենթարկվել 575 կին, որոնցից 282-ը բռնաբարության զոհ են դարձել: Վերջին 15 տարում սեռական շահագործման համար այդ երկրում քրեական գործեր են հարուցվել 241 ոստիկանի, 91 զինվորականի, 17 ժանդարմի, 15 պետպահպանության ծառայողի և 45 գվարդիականի դեմ, սակայն նրանցից ոչ մեկը չի դատապարտվել կամ պատժվել:

Անդրադառնալով թեմային' թուրքական երգիծական հանդեսները կանանց բռնությունների նկատմամբ անտարբեր ներկայիս թուքական իշխանությունների մասին «Ոստիկանական պետությունն այլես իրականություն է, հերթն առնանդամային պետությանն է» վերնագրով ծաղրանկարներ են հրապարակել: