Ո՞վ է Հրանտ Բագրատյանի անունով նամակներ ուղարկում

Քիչ առաջ տարբեր լրատվամիջոցների պաշտոնական էլեկտրոնային հասցեներին ՀՀ նախկին վարչապետ Հրանտ Բագրատյանի անունով նամակ է ուղարկվել, որը ներկայացվել է իբրև բաց նամակ։ 

Թեև նամակն ուղարկվել է Հրանտ Բագրատյանի էլեկտրոնային հասցեից, սակայն Google-ը կասկածի տակ է առել այդ նամակի՝ տվյալ հասցեից ուղարկված լինելը։ Նամակում Google-ը զգուշացնում է. This message may not have been sent by: (ապա գրված է Բագրատյանի էլեկտրոնային հասցեն)։ 

Դատելով նամակի բովանդակությունից՝ կարելի է ենթադրել, որ նամակի հեղինակն իրոք Հրանտ Բագրատյանը չէ, թեև փորձ է արվել գրելու ոճն առավելագույնս նմանեցնել վերջինիս ոճին։

Այն, որ նամակի հեղինակը պարոն Բագրատյանը չէ, երևում է նաև մի քանի այլ դետալներից. նախ տեքստում առկա են անհասկանալի կոդեր, երկրորդ՝ թեև էլեկտրոնային հասցեն, որից ուղարկվել է նամակը, համապատասխանում է Բագրատյանի՝ նախկինում ուղարկված նամակների էլեկտրոնային հասցեներին, այնուամենայնիվ հասցեից առաջ նախկին վարչապետի անունն ու ազգանունը գրված է փոքրատառով, այնինչ նախորդ նամակներում այն գրված էր մեծատառով։ Եվ վերջապես, երրորդ՝ պարոն Բագրատյանը սովորություն չունի էլեկտրոնային նամակները վերնագրել, այն էլ՝ լատինատառ հայերենով, ինչը մենք տեսնում ենք սույն նամակում։ 

Հրանտ Բագրատյանը չի պատասխանում հեռախոսազանգերին, ուստի նրանից մեկնաբանություններ ստանալ այս պահին չի հաջողվում։