Բա էս ո՞ւմ համար են այս հողերը, պարսիկների՞ (տեսանյութ)

Նաջարյանների ընտանիքը, որն արդեն երեք շաբաթ էր՝ բնակվում էր Արշակունյաց 28/1 հասցեում, երեկ մնացել է առանց կացարանի։ Դեռ երեկ կանգուն տան փոխարեն այսօր առավոտյան Լուրեր.com–ի թղթակիցը գտավ միայն փլատակներ։

Գրեթե մեկ շաբաթ ընտանիքը դիմել է թաղապետարան՝ տան օրինականացման գործընթացին ընթացք տալու նպատակով։

Հենց թաղապետարանում գտնվելու ժամանակ էլ տան տիրուհին՝ Գայանե Ասատրյանը, պատահաբար տեղեկանում է, որ իր տունը քանդում են։ Նա պատահաբար լսում է՝ ինչպես են աշխատակիցները հիմնարկի միջանցքում անցուդարձ անելիս խոսում ինչ–որ շինություն արագ քանդելու մասին։ «Հարցրեցի՝ էդ մեր տո՞ւնն եք ուզում քանդել, իրենք էլ թե՝ բա դուք ո՞վ եք», – պատմեց տիկին Գայանեն և նշեց, որ այդ պահին, երբ նա պետք է արդեն մտներ «թաղապետի» աշխատասենյակ, նրան ասում են, թե իր տունը քանդում են ու թևերից բռնելով՝ մտցնում վերելակ ու «ուղեկցում» «տուն»։

Տունը քանդելու ողջ գործընթացը տևել է չորս օր։ Առաջին օրերին Գայանեի աղջիկը՝ Անիկը, ով աշխատում է Արաբկիր բժշկական կենտրոնում, դիմել է կենտրոնի տնօրեն, ՀՀԿ պատգամավոր Արա Բաբլոյանին, ով էլ միջնորդել է, որպեսզի Անիկը հանդիպի քաղաքապետարանի պաշտոնատար անձանցից մեկին, ում լիազորությունների շրջանակում է գտնվում այդ հարցը։ Անիկը, ով, ի դեպ, Հանրապետական կուսակցության անդամ է, դիմել է տվյալ պաշտոնյային՝ Սերգեյ Մակարյանին, ով դադարեցրել է շինարարությունը և խոստացել ընթացք տալ սեփականաշնորհման գարծընթացին։ Մակարյանը հարցրել է, թե պատրա՞ստ է արդյոք ընտանիքը վճարելու սեփականաշնորհման գումարը, ինչին Անիկ Նաջարյանը պատասխանել է, թե՝ պատրաստ են։ Կնոջ պնդմամբ՝ այդ տարածքում գտնվող բոլոր տներն էլ սեփականաշնորհված շինություններ են։ Մյուս օրը, սակայն, տիկին Գայանեի խոսքերով, Մակարյանին լրիվ այլ կերպ են ներկայացրել իրականությունը, և նա փոխել է իր մոտեցումը։

«Կարծես ուրիշ մարդ լիներ։ Աղջկաս էլ ասում ա՝ բայց դուք սեփականություն ունեք, էլ ի՞նչ եք ուզում», – վրդովված պատմում է Գայանեն և իր կողմից ավելացնում՝ «բա դա սեփականություն ա. վեց տարի շարունակ վեց հոգով մի սենյականոց բնակարանում։ Չիմացանք՝ ոնց կյանքներս անցավ էս հոգսի մեջ»։ Նրա խոսքերով՝ այս տունը կառուցելու միտքն իրենց մոտ ծագել է այն ժամանակ, երբ իմացել են աղջկա՝ երկրորդ երեխայով հղի լինելու մասին։ «Ուզում էինք դոմիկ բերեինք, բայց ակերով դոմիկներն էին, են էլ երկու հազար դոլար էր, հետն էլ խոնավ ու ինչ–որ բակտերիաներով»,– շարունակում է տիկին Գայանեն։

Ըստ նրա՝ ինքը տարիներ շարունակ այդտեղի բնակիչ է եղել, այդտեղ է մեծացել, և տեսել, որ տարիներ շարունակ այդ տարածքում ոչինչ չի կառուցվել, այդ պատճառով էլ որոշել են ընտրել հենց այս տարածքը։ Իսկ թե ո՞վ է տարածքի տերը, տիկին Գայանեն տեղյակ չէ, քանի որ ոչ մի ներկայացուցիչ նրանց հետ չի կապվել, կառուցելու ընթացքում էլ նրանց ոչինչ չի ասվել։

Ապօրինի շինությունը քանդելիս տան բնակիչներին ոչ միայն նախօրոք չեն զգուշացրել, այլև ապրիլի երկուսին հանդիպելու պայմանավորվածությունը, որը ձեռք էր բերվել Գայանեի ամուսնու՝ Կարեն Նաջարյանի և թաղապետարանի միջև, փաստորեն խախտվել է։ 

Ընտանիքը, որի անդամներից միայն երկուսն են աշխատում, սպառողական վարկ է վերցրել այս տունը կառուցելու համար։ Կառուցման աշխատանքները, ընդհանուր առմամբ արժեցել են մոտ 800 հազար դրամ։ Ավելորդ գումար չունենալու պատճառով, ընտանիքի հայրն է կառուցել մոտ 30 քառ մետր տարածքով տունը։ Հենց նա էլ թաղապետարանում ստորագրել է համապատասխան դիմում՝ շինության օրինականության գործընթացը սկսելու վերաբերյալ, բայց այժմ դիմումը կամ դրա պատճենը նրանց չեն տրամադրում։ 

Տունը քանդելուց ոչ մի փաստաթուղթ չի ներկայացվել, այդ ընթացքում ներկա պաշտոնատար անձինք նույնպես հրաժարվել են ներկայանալ։ Գործողությունները կատարվել են՝ Տարոն Մարգարյանի և Սերժ Սարգսյանի անունները տալով, թե դա նրանց հրամանով է կատարվում։ Ինքը՝ տիկին Գայանեն կասկածում է, որ ղեկավար օղակները՝ քաղաքապետը, թաղապետը, տեղյակ են տիրող իրավիճակին։ Նա կարծում է, որ այստեղ թաղային հեղինակությունների միջև «ինչ–որ հաշիվներ են մաքրվել», որոնց զոհ է գնացել իրենց տունը։

Գործողությունները կատարվել են բռնի ուժի կիրառմամբ ու ակնհայտ շտապողականությամբ։ «Օպերացիայի» ղեկավարներից մեկը, տիկին Գայանեի խոսքերով, փորձել է մի լրագրողից խլել տեսախցիկը, լրագրողների մի մասի մուտքը տան տարածք արգելափակել են այդ գործողություններն իրականացնող մարդկանց մեքենաները։ 

«Տեքորս տղան՝ 15 տարեկան երեխա է, եկավ, որ քանդողներից մեկի ձեռքից քլունգը վերցնի, թույլ չտա, որ քանդեն, երեխու ձեռքերը ոլորեցին. ուզում էին տանել, հազիվ պոկեցի ձեռքներից», – պատմում է կինը։ Անիկը, տեսնելով, որ տրակտորով արդեն սկսում են քանդել տունը, վերցնում է ջարդված ապակու կտորը և սպառնում ինքնասպան լինել։ Այնուհետև, վերջինիս մոտ սուր ցավեր են սկսվում, և երեխային վիժելու վտանգ է առաջանում, սակայն ժամանած շտապօգնության աշխատակիցները կարողանում է կանխել դժբախտությունը։

Ինքը՝ Գայանե Ասատրյանը, այդ ամենը ներկայացնող տեսանյութում, սկզբում նշում է, թե հացադուլ է հայտարարում, մինչև հարցին վերջնական լուծում չտրվի, սակայն աղջկա հորդորներին անսալով՝ կինը հրաժարվում է իր մտադրությունից։ 

«Չեն աջակցում երիտասարդ ընտանիքներին, մենք էլ մեր ուժերով փորձում ենք ինչ–որ բան ասել։ Բա էս ո՞ւմ համար են այս հողերը, պարսիկների՞», – հետաքրքրվում է տիկին Գայանեն՝ հավելելով, որ եթե այս հարցը չլուծվի և իրենց տունը չվերակառուցվի, իրենց ընտանիքը կլքի Հայաստանը։

Օվսաննա Գևորգյան