Շուշան Պետրոսյանը ՀՌԱՀ որոշման և իր` մշակույթի նախարար դառնալու մասին

Այսօր մամուլում կրկին լուրեր էին տարածվել, որ երգչուհի, ԱԺ պատգամավորության թեկնածու Շուշան Պետրոսյանը ԱԺ ճամփան չի բռնի: Ըստ մամուլի հրապարակման' ՀՀԿ-ն նրան տեսնում է գործադիրում, այն էլ' մշակույթի նախարարի կամ փոխնախարարի պաշտոնում:

Լուրեր.com-ը տեղեկությունը փորձեց ճշտել Շուշան Պետրոսյանից, ով մեզ հետ զրույցում ասաց, որ դա սանձարձակ բան է' առանց իրենից հարցնելու նման սուտ տեղեկություն գրելը. «Ղալաթ են արել' գրել են, մարդն իր համար հանգիստ ապրում է, ի՞նչ են խառնվել իրար», -ասաց երգչուհին:

Ըստ մամուլի մեկ այլ հրապարակման' օրերս հեռարձակողների հետ հանդիպման ժամանակ ՀՌԱՀ նախագահ Գրիգոր Ամալյանը զգուշացրել է, որ նախընտրական քարոզարշավի ժամանակ երգչուհի Շուշան Պետրոսյանի երգերի տեսահոլովակներն ու ձայնագրությունները դիտվելու են որպես քարոզչություն Հանրապետական կուսակցության օգտին, հետևապես՝ դրանք պետք է լինեն միայն սահմանված ժամերին կամ ընդհանրապես չլինեն, սակայն հեռարձակողներն էլ իրենց հերթին դժգոհել են, քանի որ առջևում ապրիլի 24-ն է, և այդ օրը հայրենասիրական երգեր են հնչում, իսկ նման երգերում առնվազն «Հայաստան» երգը երգում է Շուշան Պետրոսյանը:

Փորձեցինք երգչուհուց պարզել իր կարծիքը նաև այս հարցի շուրջ:

«Քարոզարշավ չեմ համարում, հետո էլ առանձնապես ինձ ցույց չեն էլ տալիս: Բայց եթե ուզում են լսեն այն նույն որակը, ինչ հիմա լսում են, թո՛ղ լսեն, Աստված իրենց հետ»,-ասաց Շուշան Պետրոսյանը և հավելեց, որ իրեն ուրախացրել է այն փաստը , որ մարդիկ հասկացել են,որ հատկապես Ապրիլի 24-ին հայրենասիրական երգերը պետք է հնչեն, «առավել ևս հայրենասիրական երգերը , առավել ևս Ապրիլի 24-ին»:

Գայանե Համբարձումյան