Թուրքիայում հնարավոր է ազատ արձակեն PKK-ի առաջնորդ Աբդուլլահ Օջալանին

Քրդստանի աշխատավորական կուսակցության (PKK) առաջնորդ Աբդուլլահ Օջալանը, ով ցմահ ազատազրկման պատիժ է կրում Թուրքիայի Իմրալի կղզու բանտում, կարող է ազատ արձակվել:

Այս մասին, ինչպես հաղորդում է «Արմենպրես»-ը, թուրքական «Հուրիեթ» թերթին տված հարցազրույցում հայտարարել է Թուրքիայի իշխող «Արդարություն և զարգացում» կուսակցության (AKP) նախկին փոխնախագահ Միրմեհմեթ Դենգիր Ֆըռաթը:

Նրա խոսքով' ներկայումս ոչ մի անհրաժեշտություն չկա Օջալանին պահելու անազատության մեջ, քանի որ նա հանդես է գալիս բռնության և ահաբեկչության դեմ:

«Օջալանն այժմ հանդես է գալիս բոլոր տեսակի բռնությունների դեմ, և նա PKK-ի մարտիկներին կոչ է արել վայր դնել զենքը»,- նշել է Ֆըռաթը, ով, ի դեպ, AKP-ի հիմնադիրներից է:

Օջալանն օրերս PKK-ին կոչ էր արել վերջ դնել քրդական ինքնավարության համար զինված պայքարին և բռնել քաղաքական պայքարի ուղին: Թուրքական ԶԼՄ-ները դա համարում են Օջալանի հետ վերջին երկու տարիներին անցկացված ինտենսիվ բանակցություների արդյունք:

PKK-ի առաջնորդին ԱՄՆ-ի հետախուզությունը 1999 թվականի փետրվարի 19-ին ձերբակալել էր Քենիայում և հանձնել թուրքական կողմին, որը նրան ցմահ բանտարկության էր ենթարկել Մարմարա ծովի Իմրալի բանտում:

1980-ականներից PKK-ի սկսած զինված պայքարի արդյունքում Թուրքիայի զինված ուժերի հետ բախումներում մոտ 40 հազար մարդ է զոհվել, իսկ Թուրքիայի տնտեսությունը տասնյակ միլիարդ դոլարների վնաս է կրել: