Դեռ ժամանակ կա սեփականության հարցերն իրավական հարթությունում լուծելու մասին մտածելու համար. Մանվել Սարգսյան

Մաշտոցի պուրակում տեղադրված կրպակները մարտի 31-ին ապամոնտաժելու մասին տասը քաղաքացիների հայտարարությանն ի պատասխան ՀՀ Ոստիկանության տարածած հայտարարությունը Facebook սոցցանցի օգտատերերի քննարկման առարկան է դարձել։ 

Կրպակներն ապամոնտաժելու մտադրության վերաբերյալ հայտարարություն տարածած տասը քաղաքացիներից քաղաքագետ Մանվել Սարգսյանը սոցցանցում գրել է, որ «մարդիկ դիմացինի մասին դատում են իրենց դավանած արժեքներին համապատասխան՝ վախեցնելով ձերբակալությամբ և դատավարությամբ։ Հիմար մարդիկ չեն հասկանում, որ խոսքը մարդու արժանապատվությանն է վերաբերում։ Իսկ այդ հարցում ձերբակալությունն ու դատավարություններն անզոր են։ Մարտի 31-ին ապամոնտաժողները գործի կանցնեն։ Եթե կկարողանան ձերբակալել և ազատազրկել նրանց, դա իրենց գործն է։ Իսկ եթե չկարողանան՝ ոստիկանների գումարտակը Մաշտոցի պուրակում կմնա երեք տարի։ Եվ ո՛չ միայն Մաշտոցի պուրակում։ Ոստիկանները ստիպված կլինեն նստել երկրի բոլոր ապօրինի կրպակների կողքին՝ մինչև ոստիկանությանը հրաման տվողները չհասկանան, որ նման եղանակով սեփականություն չեն պաշտպանում։ Սեփականությունը պաշտպանված է, երբ հասարակությունը օրինական է ճանաչում այն... Ապամոնտաժողների խումբը ապօրինի կրպակների տերերին կփորձի բացատրել այս պարզ ճշմարտությունը։ Իշխանությունների երկարաժամկետ ապօրինի գործողությունները հասարակության մեջ իշխանության նկատմամբ նիհիլիզմ են ծնում։ Գալիս է ժամանակը, երբ ժողովուրդն ի՛նքն է որոշում կայացնում, և այդժամ իշխանություններին սեփականության հարցն օրենքի շրջանակներում լուծելու կոչ անող ապամոնտաժողների խմբի փոխարեն գալիս են փայտերով և բահերով զինված մարդիկ։ Ղրղզստանի փորձը թող օրինակ ծառայի... Չի՛ կարելի ժողովրդին հասցնել այդ վիճակի։ Դեռ ժամանակ կա սեփականության հարցերն իրավական հարթությունում լուծելու մասին մտածելու համար»։ 

Հիշեցնենք, որ օրեր առաջ Մաշտոցի պուրակում տեղադրված կրպակներն ապամոնտաժելու մասին Մաշտոցի այգում 1,5 ամիս բողոքի ակցիա անցկացնող ակտիվիստները նամակ էին հղել ՀՀ ոստիկանապետ Վլադիմիր Գասպարյանին' տեղեկացնելով, որ մարտի 31-ին, ժամը 13:00-ին մի խումբ մարդիկ սեփական ձեռքերով ապամոնտաժելու են այգում տեղադրված տաղավարները:

«Իր որոշման մեջ կառավարությունը չի հիմնավորել տաղավարների ապամոնտաժման համար երեք տարի ժամկետ տրամադրելու պատճառը։ Դրա հետևանքով քաղաքացիների և Երևանի քաղաքապետի միջև առաջացած վեճը չի ստացել իր վերջնական լուծումը։ Մարտի 17-ին երիտասարդական քաղաքացիական նախաձեռնությունների անդամները, ղեկավարվելով անմիջական ժողովրդավարության, իրավունքի գերակայության և սահմանադրականության սկզբունքներով, ձևավորել են «Քաղաքացիական արդար և անկախ դատարան»։ Քաղաքացիների դատարանը պահանջել է Երևանի քաղաքապետարանից 10-օրյա ժամկետում ապամոնտաժել Մաշտոցի պուրակում տեղադրված տաղավարները և այգին բարեկարգել ու օգտագործել դրա նպատակային նշանակությանը համապատասխան: Երևանի քաղաքապետը թողել է այդ պահանջը անպատասխան», – գրել էին նամակի հեղինակները։

Նրանք նշել էին նաև, որ մարտի 27-ին պուրակում ՀՀ քաղաքացիների ժողով է կազմակերպվել, որի մասնակիցները, ընդունելով «Քաղաքացիական արդար և անկախ դատարանի» հեղինակությունը, վստահելով դրա անկախությանն ու անկողմնակալությանը, իրավական եզրակացության և վճռի հիմնավորվածությանը, որոշել են հայտնել իրենց պատրաստակամությունը՝ ապամոնտաժել Մաշտոցի պուրակում անօրինական կառուցված տաղավարները սեփական միջոցներով:

«Ուստի տեղեկացնում ենք Ձեզ, որ մարտի 31-ին, ժամը 13:00-ին Մաշտոցի պուրակում նախատեսված է ապամոնտաժել անօրինական կառուցված տաղավարները: Ապամոնտաժման աշխատանքները կատարելու են հետևյալ անձինք' Էմիլ Աբրահամյան, Ստեփան Դանիելյան, Տիգրան Խզմալյան, Հարություն Կարապետյան, Արմեն Հովհաննիսյան, Հայկազն Ղահրիյան, Անդրիաս Ղուկասյան, Կարեն Շիկոնյան, Մանվել Սարկիսյան, Սարո Սարոյան», – ասված էր նամակում: