Թուրքիայում պետական դրոշը հերթական անգամ պղծվել է

Թուրքիայի Հանրապետության պետական դրոշը հերթական անգամ պղծվել է:

Այս մասին, ինչպես հաղորդում է «Արմենպրես»-ը, հայտնում է Թուրքիայի զինված ուժերի գլխավոր շտաբի կայքը:

Թուրքիայի հարավարևելյան Հաթայի (Անտիոք) նահանգի Դորդյոլ շրջանում փետրվարի 28-ին երեկոյան ժամը 20:30-ին անհայտ անձինք հանել և իրենց հետ տարել են Ընտանիքի առողջության կենտրոնի բակում ամրացված թուրքական դրոշը:

Մյուս դեպքը տեղի է ունեցել Անթալիայի նահանգի Մուրադփաշա շրջանում: Այստեղ մարտի 1-ին գիշերը ժամը 00:30-ին 4-հոգիանոց խումբը իջեցրել է «Մեհմեդ Աքիֆ Էրսոյ» կրոնական դպրոցի բակում ամրացված թուրքական դրոշը:

Թուրքիայում այդ երկրի պետական դրոշը դրոշաձողերի վրայից իջեցվելու և պղծելու, ինչպես նաև Թուրքիայի Հանրապետության հիմնադիր Աթաթուրքի հուշարձանները շրջելու, դրանց վրա ներկ լցնելու միջոցով պղծելու դեպքերը շատացել են:

Որոշ վերլուծաբաններ նման դեպքերի հաճախակիանալը կապում են Թուրքիան 2003 թվականից որպես վարչապետ, 2014 թվականից' որպես նախագահ արդեն 12 տարի կառավարող Ռեջեփ Թայիփ Էրդողանի' երկիրը դեպի իսլամացում և սուլթանական կառավարում տանող քաղաքականության դեմ մարդկանց բողոքի հետ: