«Հայկական Ժամանակ». ԱԺ ընտրություններին մասնակցելու է մահացած ակադեմիկոս Ֆադեյ Տաճատի Սարգսյանը

Գալիք խորհրդարանական ընտրությունների «հմայքը» դառնալու են ընտրացուցակները: Ընտրողների պաշտոնական թիվը Հայաստանում աճում է նույնքան սրընթաց, որքան արտագաղթի պատճառով նվազում է բնակչությունը: Եթե այսպես շարունակվի, ապա շատ շուտով ընտրողների թիվը ավելի մեծ կլինի, քան Հայաստանի ամբողջ բնակչությունը:

 Ինչի՞ շնորհիվ է աճում ՀՀ ընտրողների թիվը: Աոաջին հերթին այն բանի շնորհիվ, որ 18 տարին լրացած անձանց մտցնում են ցուցակ, բայց մահացածներին չեն հանում ցուցակներից: Սա, իհարկե, պատահաբար չի արվում, և ընտրողների թվի ուռճացումը ձեռնտու է առաջին հերթին ՀՀԿ-ին, և դա այս կուսակցության համար ընտրակեղծիքների անասելի մեծ հնարավորություններ է ստեղծում: Ընտրողների թվի ուռճացման հրահանգը կատարողները, սակայն, միջոցների առաջ կանգ չեն առնում և ցուցակներում են թողնում նույնիսկ հանրությանը քաջ հայտնի հանգուցյալներին:

Օրինակ, Երևանի թիվ 10 ընտրատարածքի՝ Չեխովի անվան դպրոցում տեղակայված 30-րդ տեղամասում, ըստ ընտրացուցակների, քվեարկությանը մասնակցելու է Ֆադեյ Տաճատի Սարգսյանը: Ճիշտ է, հայտնի գիտնականը, ակադեմիկոսը, ԳԱՍ նախկին նախագահը, պետական գործիչը վախճանվել է երկու տարի առաջ՝ 2010 թվականի հունվարին, բայց ընտրացուցակները կազմող ՀՀ ոստիկանության համար, ինչպես երևում է, նա միշտ ողջ է:

«ՀԺ». Մեզ համար էլ: Ուստի ոստիկանությունից պահանջում ենք մեզ վերադարձնել մեր բոլոր երևելիներին՝ Տիգրան Մեծից ու Մեսրոպ Սաշտոցից մինչև Պետրոս Դուրյան ու Հովհաննես Թումանյան: Ընդ որում, մեզ համար կարևոր չէ, թե նրանք որ ընտրատեղամասերում են քվեարկելու: Հա, չմոռանաք նաև Գարեգին Նժդեհին՝ թող անձամբ գա ընտրելու ու տեսնի, թե իր անունը հոլովող կուսակցությունն ինչ «պայծառ» ապագա է տանում Հայաստանը: Գուցե Նժդեհին ընտրացուցակում ընդգրկելուց հետո հավատանք, որ կփոխվեն: