Los Angeles Times. Թորոս Ռոսլինի գողացված մանրանկարները՝ ամերիկյան թանգարանում

«Paul Getty» թանգարանը դիմում էր ներկայացրել Լոս Անջելեսի Գերագույն ատյանի դատավորներին՝ փորձելով կասեցնել ավելի քան 750-ամյա Զեյթունի Ավետարանի էջերն իրենց օրինական տիրոջը վերադարձնելու դատը։

Դատարանը մերժել է ընթացք տալ այդ դիմումին։ Դատավորը հնարավորություն է տվել կողմերին առաջիկա ամիսներին շարունակելու բանակցությունները։ Համաձայնության չգալու դեպքում կողմերը պիտի դատարան ներկայանան 2012թ. Մարտի 2-ին։

Թանգարանի դեմ հայցով դատարան է դիմել Մեծի Տանն Կիլիկիո կաթողիկոսության Միացյալ Նահանգների Արևմտյան թեմը։ Վեճի առարկան Թորոս Ռոսլինի ծաղկած Զեյթունի Ավետարանի 8 էջերն են, որոնք Հայոց ցեղասպանության օրերին գողացվել էին և 1994 թ. վաճառվել թանգարանին 950.000 դոլարով։ Թեմը ցանկանում է կորուսյալ էջերը վերադարձնել Երևանի Մատենադարան, ուր պահվում է Ավետարանը։

Մասնագետները նշում են, որ Զեյթունի Ավետարանի նման արվեստի գործը պետք է պահպանվի միասնաբար։ Նրանք նաև կարծում են, որ վերջին տարիներին Հունաստանից, Իտալիայից և այլ երկրներից գողացված արվեստի ավելի քան 40 ստեղծագործություն վերադարձրած թանգարանը պետք է այս էջերը ևս վերադարձնի, սակայն թանգարանի պատասխանատուները շարունակում են ընդդիմանալ։

Մատենադարանի տնօրինությունը դեռ անցյալ տարի գրել էր Արևմտյան թեմի իրավաբաններին, որ արտոնում է նրանց Մատենադարանի շահերը ներկայացնելու։ Արևմտյան թեմը ներկայացնող իրավաբան Վարդգես Եղիայանը հայտնում է, որ ամերիկյան թանգարաններում հայտնաբերվել է կասկածելի ճանապարհներով ձեռք բերված հայկական առնվազն 60 արվեստի նմուշ։

Այս մասին գրում է «Los Angeles Times»-ը։