Թուրքիայում բռնությունների քանակն աճել է. IHD

Նախորդ տարի բռնությունները Թուրքիայում, նախկին տարիների համեմատ, զգալիորեն աճել են:

Այս մասին, ինչպես հաղորդում է «Արմենպրես»-ը, հայտնում է The Human Rights Associations (IHD) իրավապաշտպան կազմակերպության զեկույցում (Human Rights Breaches Report 2014):

Ըստ զեկույցի՝ 2014 թվականին տեղի ունեցած բողոքի ակցիաների և ցույցերի ժամանակ իրավապահների իրականացրած գործողությունների ընթացքում Թուրքիայում տարբեր աստիճանի մարմնական վնասվածքներ են ստացել 1539 քաղաքացիներ, այդ թվում՝ 112 երեխա, բանտարկվել ավելի քան 11 հազար 262 մարդ, այդ թվում՝ 241 փախստական:

«2014 թվականին Թուրքիայում սպանվել է 296 կին, 39 կին ինքնասպանություն է գործել, 191-ը ենթարկվել են սեռական բռնությունների, 585-ը հոսպիտալացվել են տղամարդկանց կողմից ծեծի ենթարկվելու և այլ մարմանական վնասվածքներ ստանալու հետևանքով: Ես 13 կին մահացել է անհայտ հանգամանքներում», -ասվում է զեկույցում:

Նշվում է, որ Թուրքիայի 3400 քաղաքացիներ անարդար պատիժներ են կրել, ենթարկվել խոշտանգումնների և նվաստացումների, նրանցից 1020-ը նման վերաբերմունքի արժանացել են կալանավայրերում:

Զեկույցում նաև նշվում է, որ 2014 թվականին Թուրքիայում անչափահասների նկատմամբ կիրառված բռնարարաքների արդյունքում 44 երեխա սպանվել, 219-ն էլ վիրավորվել են: Կալանավայրերում դաժան վերաբերմունքի և բռնությունների են ենթարկվել 64, իսկ քաղաքացիական կյանքում՝ 23 երեխա:

Ըստ զեկույցի՝ Թուրքիայում 2014 թվականին ազգայնական և ազգատյացության դրդապատճառներով հարձակումների արդյունքում 6 մարդ սպանվել, ևս 17-ը վիրավորվել է: