BRICS–ի հիմքերը շատ թույլ են. The Financial Times

Բրիտանական հեղինակավոր The Financial Times պարբերականը գրում է, որ BRICS–ը որպես առանձին կառույց կարելի է հաջողված համարել։  Այս միավորումն աշխարհի ուշադրությունն է հրավիրում զարգացող տնտեսություն ունեցող հինգ երկրների իշխանության և ազդեցության ամրապնդման վրա, որոնց բաժին է ընկնում աշխարհի բնակչության գրեթե կեսը և համաշխարհային տնտեսության մեկ քառորդը։

Սակայն, ինչպես նշում է հեղինակավոր պարբերականը, այս շաբաթ տեղի ունեցած BRICS–ի անդամ երկրների (Բրազիլիա, Ռուսաստան, Հնդկաստան, Չինաստան և Հարավաֆրիկյան հանրապետություն) ղեկավարների հանդիպումը ցույց տվեց, որ այդ հզոր զարգացող շուկաներն ավելի տարանջատված են, քան միավորված։

Գագաթնաժողովի մասնակիցները դատապարտել են բռնությունները և խաղաղության կոչ են արել աշխարհի զարգացած և զարգացող երկրներին, ինչպես նաև կոչ են արել դիվանագիտական ճանապարհով երկխոսել Իրանի հետ։

Ըստ պարբերականի՝ շատ դժվար կլինի այնպիսի հարցերի շուրջ եզրեր փնտրել, ինչպիսին անվտանգությունն է, քանի որ հենց այդ կառույցի անդամ երկու երկրների՝ Չինաստանի և Հնդկաստանի միջև խորը արմատացած սահմանային վեճեր կան, իսկ դրան գումարած Ռուսաստանը դեռ շարունակում է Չինաստանի հետ սպառազինությունների մրցավազքը։ 

Պարբերականը նշում է, որ շատ դժվար է վստահության դաշտ ստեղծել, երբ այդ կառույցի անդամ երկրների միջև քաղաքական տարաձայնություններ գոյություն ունեն և որդեգրել են կոմունիստական, ավտորիտար և ժողովրդավարական կառավարման ռեժիմներ։