Առաջին ապամոնտաժողները մտան Մաշտոցի պուրակ

Քիչ առաջ Մաշտոցի պուրակ ժամանեցին պուրակում տեղակայված կրպակներն ապամոնտաժելու մտադրություն հայտնած 10 քաղաքացիներից չորսը: Նրանց թվում է քաղաքագետ Մանվել Սարգսյանը: Վերջիններս պուրակ են եկել բանվորի շորեր հագած: 

Այս պահին Մաշտոցի պուրակում մթնոլորտը լարված է: Ոստիկանությունը պատրաստվում է միջոցներ ձեռնարկել՝ քաղաքացինեի գործողությունները կասեցնելու նպատակով: 

Ակտիվիստներն իրենց հերթին տարբեր կարգախոսներ են վանկարկում: 

Ապամոնտաժման աշխատանքները դեռ չեն սկսվել, պաշտոնապես աշխատանքների մեկնարկը պետք է տրվի ժամը 13:00-ին: Կրկպակների մոտ տեղադրված են երկաթե պատնեշներ, որոնք տեղադրվել էին մի քանի օր առաջ:

Քիչ առաջ ոստիկանությունը պուրակում հանդես եկավ հայտարարությամբ, որի հետ զուգահեռ այգում հավաքված բնապահապանները սկսեցին երգել. «Զարթնիր լաո, մեռնիմ քըզի» երգը:

Նշենք նաև, որ բնապահպաններին են միացել նաև ԱԺ պատգամավորներ Զարուհի Փոստանջյանը, Անահիտ Բախշյանը և Սարդարապատ շարժման ներկայացուցիչները: