Մենք արդեն ասել ենք ոտիկաններին ինչ–որ պետք է, էլ նրանց հետ խոսելու բան չունենք. Մաշտոցի պուրակի ակտիվիստներ (տեսանյութեր)

Մաշտոցի պուրակում ապամոնտաժող խումբն այսօր հարմար տեղ էր փնտրում կրպակների տարածք մուտք գործելու և ապամոնտաժումը սկսելու համար։ 

Հիշեցնենք, որ ոստիկանության հետ բանակցությունների ժամանակ խումբը հայտարարել էր, որ ոչ մի բռնի գործողության չի դիմելու, և կրպակների ապամոնտաժումը կրելու է բացառապես խաղաղ բնույթ։ 

Խմբի անդամները հայտարարում են, որ պատրաստ են այսպես քայլել կրպակների շուրջ նույնիսկ երեք տարի, եթե դրա անհրաժեշտությունը լինի։ 

Ակտիվիստների հետ միասին պուրակում գտնվում են նաև մեծ թվով ոստիկաններ, նաև՝ վահաններով և սաղավարտներով։ Երևանի փոխոստիկանապետ Ռոբերտ Մելքոնյանը Լուրեր.com-ի հետ զրույցում նշեց, որ ոստիկանների այսպիսի մեծ թիվը պայմանավորված է բացառապես պուրակի ակտիվիստների անվտանգության ապահովման նկատառումներով։ «Ձեր անվտանգությունն ենք ապահովում, որպեսզի անօրինական գործողություններ չանեք»։

«Մենք չենք զբաղվելու ոչ մի անօրինությամբ. իրենք հեռանալու են, մենք մտնելու ենք», – վստահեցնում են ապամոնտաժող խմբի անդամները։ 

Նրանք համոզված են, որ «խուլիգանի հետ պետք չէ խուլիգանի լեզվով խոսել» և խումբը պատրաստ է այստեղ մնալ մինչև ոստիկանությունը չհասկա, որ իր գործողությունները անօրինական են և չհեռանա կրպակների տարածքից։

«Ձևեր շատ կան հասկացնելու։ Հասկացնելը հո մի անգամ ասելը չէ, խոսքով մի՛ անգամ են մարդուն ասում։ Մենք արդեն ասել ենք ոտիկաններին ինչ–որ պետք է, էլ նրանց հետ խոսելու բան չունենք», – նշում են խմբի անդամները։