Բին Լադենի երիտասարդ կինը բացահայտել է ընտանիքի գաղտնիքները. The Washington Post

Ուսամա բին Լադենի ամենաերիտասարդ կինը հարցաքննության ժամանակ պատմել է, որ Ալ–Կաիդայի առաջնորդը իր ժամանակի մեծ մասը ծախսում էր՝ փախնելով մի ապաստանից մյուս ապաստանը Պակիստանի տարբեր քաղաքներում։ Այդ ընթացքում նա դարձել է չորս երեխաների հայր, գրում է The Washington Post–ը։ 

ԱՄՆ–ում 2001–ի սեպտեմբերի 11–ի ահաբեկչություից հետո Ուսամա բին Լադենի կյանքի մանրամասները ներկայացված են Ալ–Կաիդայի սպանված առաջնորդի 30-ամյա կնոջ` Ամալ Ահմեդ Աբդուլֆատայի հարցաքննության հիման վրա կազմված զեկույցում։

Աբդուլֆատան քննիչներին պատմել է, որ ընտանիքը 2001–ի սեպտեմբերի 11–ի ահաբեկչությանը հաջորդած մի քանի ամսիներին առանձին 1 ապրել Բին Լադենից, իսկ 2002–ին նորից միավորվել են Փեշավար քաղաքում, իսկ այնուհետև տեղափոխվել Սվաթ հովիտը։ Որոշ ժամանակ անց տեղափոխվել են Հարիփուր՝ Պակիստանի մայրաքաղաք Իսլամաբադի մոտ։ Այս ընթացքում Ամալ Աբդուլֆատան երկու որդի է ունեցել Պակիստանի պետական առողջապահական հաստատություններում, և ամեն անգամ այդ կլինիկաներում մնացել է ընդամենը երկու-երեք ժամ։

Ի վերջո, ընտանիքը 2005–ին վերջնականապես հաստատվել է Աբոտաբադ քաղաքում, որտեղ Բին Լադենի 30–ամյա կինը ևս երկու երեխա է ունենում։ Հենց այդ տանը անցյալ տարի մայիսին Բին Լադենը սպանվեց ամերիկյան հատուկ ուժերի կողմից։ Հարձակման ժամանակ Աբդուլֆատան վիրավորվում է ոտքից։

Ներկայումս Աբդուլֆատան կալանքի տակ է պահվում Պակիստանում Բին Լադենի մյուս երկու կանանց և նրանց մի քանի չափահաս երեխաների հետ։ Ընտանիքի փաստաբանը հայտնել է, որ երկուշաբթի հնարավոր է՝ նրանց դեմ մեղադրանք առաջադրվի Պակիստանում անօրինական բնակության մեղադրանքով, որն, ըստ պակիստանյան օրենքների, հինգ տարվա ազատազրկում է նախատեսում։

Ինչպես նշում է հեղինակավոր պարբերականը, Բին Լադենին վնասազերծելու ժամանակ ԱՄՆ–ի և Պակիստանի պաշտոնատար անձանց մեծ մասը հայտարարել էր, որ Ալ–Կաիդայի առաջնորդը թաքնվում է Պակիստանի և Աֆղանստանի սահմանամերձ հեռավոր շրջաններում: Նրանք նույնիսկ չէին բացառել քարայրներում բնակվելու հնարավոր տարբերակը։