Թուրքիայի ԶՈւ և PKK-ի միջև բախում է տեղի ունեցել

Քրդստանի աշխատավորական կուսակցության (PKK) զինված թևը միակողմանի հայտարարած երկարատև հրադադարից հետո առաջին անգամ գնդակոծել է Թուրքիայի զինված ուժերի Իրաքի հետ սահմանակից Հաքքարի նահանգի Յուքսեքովա շրջանի Դաղլըջա գյուղի դիրքերը:

Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը' հղում կատարելով Թուրքիայի ԶՈւ գլխավոր շտաբին:

Թուրքական զորամիավորումները պատասխան կրակ են բացել PKK-ի հրանոթային զարկերին: Այնուհետև հակառակորդ ուժերի միջև ավտոմատներից և գնդացիրներից փոխադարձ գնդակոծություն է տեղի ունեցել:

Թուրքիայի կառավարությունը 2009 թվականից քրդական խնդիրը լուծելու ուղղությամբ մտադրությունների ծրագիր էր մշակել, ըստ որի, խնդրի կարգավորման շուրջ կառավարությունը կսկսի քայլեր կատարել, եթե PKK-ն վայր դնի զենքը և զինյալներին դուրս բերի Թուրքիայի տարածքից: Իմրալի բանտում ցմահ ազատազրկված PKK-ի առաջնորդ Աբդուլլահ Օջալանի հետ երկարատև բանակցություններից հետո ձեռք բերված այդ համաձայնության շրջանակում քրդերը սկսել էին դուրս բերել զինյալներին : Սակայն, տեսնելով, որ Թուրքիայի կառավարությունը ոչ մի կոնկրետ քայլ չի կատարում քրդական խնդրի կարգավորման համար, PKK-ն դադարեցրել էր գործընթացը:

PKK-ի և Թուրքիայի ԶՈւ միջև բախումների վերսկսումն, ամենայն հավանականությամբ, կապված է այն բանի հետ, որ Թուրքիայի նախագահ Ռեջեփ Թայիփ Էրդողանը, խոստումը կատարելու փոխարեն, օրերս հայտարարել է, թե «Թուրքիայում քրդական խնդիր գոյություն չունի»: PKK-ի զինյալ թևը դրան ի պատասխան հայտարարել է, որ կպահպանեն նախկին պայմանավորվածությունները, եթե Թուրքիայի կառավարությունը քրդական խնդիրը լուծելու մասին համաձայնագիր ստորագրի իրենց հետ: