Սիրիայի հայ համայնքը կարժանանա Իրաքի հայկական համայնքի ճակատագրին

Շատ քաղաքագետներ Սիրիայի վարչակազմի առկայության հետ են կապում սիրիահայ համայնքի գոյության փաստը:

-Ասել, որ Սիրիայում իշխանությունների փոփոխությունը չի սպառնում սիրիահայ համայնքի ազգային անվտանգությանը կամ գոյությանը, միանշանակ սխալ է,- ասաց «Նորավանք» գիտահետազոտական կենտրոնի գիտաշխատող, արաբագետ Արաքս Փաշայանը:

Եթե այնուամենյանիվ Սիրիայում իշխող վարչակազմը փոխվի, ապա սիրիահայ համայնքը, ինչպես դա եղավ Իրաքի հայկական համայնքի դեպքում, կգաղթեն ԱՄՆ կամ Եվրոպա:

–Մեր իշխանություններն անշուշտ ի վիճակի չեն  Սիրիայից փախստականներ ընդունել, և Սիրիայի պարագայում  Հայաստանը, ինչպես իրաքահայերի մոտ, զուտ ժամանակավոր կացարանի պես կլինի,- ասաց արաբագետ Արաքս Փաշայանը:

Իրաքահայերը եկան Հայաստան այստեղ տուն գտնելու հույսով, սակայն իշխանությունները ի վիճակի չեղան և չկարողացան նրանց ապահովել կացարանով:

Նա նաև նշեց, որ հայերը արաբների հետ համակեցության հարյուրավոր տարիների փորձ ունեն, հայերին հարգում են Սիրիայում և նրանց հետ խնդիրներ կամ անհամաձայնություններ չկան: Չնայած վերջերս Սիրիայում հայկական համայնքին քննադատել էին կոնկրետ քաղաքական դիրքորոշում չունենալու մեջ:

Դա բնական է փոքրամասնությունների դեպքում, քանի որ ազգային փոքրամասնությունների համար տվյալ երկրում կարևոր և ցանկալի է կայունության և խաղաղության պահպանումը:

Այն շրջաններում, որտեղ հայերն են բնակվում, այնտեղ իրավիճակը հանդարտ է: Մտահոգիչ է միայն Կամիշլիի իրավիճակը, որտեղ հայեր են ապրում. Հալեպում, Դամասկոսում, Լատակիայում, Քեսաբում իրավիճակը հանգիստ է և հեռու է այն շրջաններից, որտեղ կենտրոնացած են ներկայիս վարչակարգի դեմ պայքարող ապստամբները:

Ի դեպ, զարմանալին այն է, որ իրականում սպանվածների և վիրավորվածների մեջ ավելի շատ են սիրիական ոստիկանության աշխատակացիները: