Ահմեդ Զակաևին փորձել են սպանել Ռամզան Կադիրովի պատվերով. The Telegraph

Բրիտանական MI5 հետախուզական գործակալությունը նախապես տեղյակ է եղել չեչենական անջատողականների առաջնորդ Ահմեդ Զակաևի նկատմամբ նախապատրաստվող սպանության մասին, որը պետք է իրականացվեր Լոնդոնի բանուկ փողոցներից մեկում, գրում է The Telegraph–ը։

Սպանությունը նախապատրաստող միջնորդը 45-ամյա ռուս է եղել, որն ապրում է Մեծ Բրիտանիայում։ Նրա անունը գաղտնի է պահվում, միայն հայտնի է, որ նա 6 երեխաների հայր է և նախկինում զինվորական է եղել։ Հետաքննչական փաստաթղթերում նրա անունը հիշատակվում է որպես E1։

Զակաևին սպանելու ենթադրյալ պատվիրատուն եղել է Չեչնիայի նախագահ Ռամզան Կադիրովը, իսկ E1–ին հանձնարարված է եղել սպանության անմիջական կատարողներին արժեքավոր տեղեկություններ ապահովել։ Ըստ MI5–ի՝ E1–ը ներգրավված է եղել 2009–ին Վիեննայում Կադիրովի նախկին թիկնապահ Ումար Իսմայլովի սպանության մեջ։

E1–ը և նրա ընտանիքը չեչեն փախստականների կարգավիճակով առաջին անգամ Մեծ Բրիտանիա են ժամանել 2003-ին։ 2009–ին մերժել են Մեծ Բրիտանիայի քաղաքացիություն ստանալու նրա դիմումը, թեև նրա կինը և երեխաներն արդեն դարձել էին Մեծ Բրիտանիայի քաղաքացիներ։ Միևնույն ժամանակ նրան մշտական բնակության իրավունք է շնորհվում։

2010–ին, երբ E1–ը մեկնում է Մեծ Բրիտանիայից, նրան խորհուրդ են տալիս չվերադառնալ, քանի որ նա այդ դեպքում իրավունք չի ունենա բողոքարկել Բրիտանիայի քաղաքացիություն ստանալու մերժումը։ Սակայն նա վերադառնում է, որից անմիջապես հետո նրան ձերբակալում են։ Այնուհետև սկսվում է հանուն իր իրավունքների պաշտպանության Բրիտանիայի տարածք մուտք գործելու համար օրինական պայքարը։

MI5–ը պնդում է, որ E1–ը լուրջ սպառնալիք է անվտանգության տեսակետից։ Զակաևի նկատմամբ սպանություն նախապատրաստելու մասին տեղեկությունները, որում ներգրավված է եղել E1–ը, բացահայտվել է դատարանում, գրում է The Telegraph–ը։

Զակաևը հեղինակավոր պարբերականին տված հարցազրույցում ասել է, որ տեղյակ չի եղել իր դեմ նախապատրաստվող մահափորձի մասին, սակայն նշել է, որ իրեն ավելի վաղ փորձել են սպանել։

«Հիմա Մեծ Բրիտանիայում շատ ռուսական լրտեսներ կան, որոնք գործում են Սառը պատերազմի ժամանակներից սկսած։ Ես կարծում եմ, որ բրիտանական կառավարությունը և հատուկ ծառայությունները տեղյակ են դրա մասին և այդ առումով ոչինչ չի փոխվի, քանի դեռ Վլադիմիր Պուտինը չի զիջել իրենց դիրքերը Ռուսաստանում։ Նրանք կշարունակեն սպառնալ ինձ և իրենց բոլոր քաղաքական հակառակորդներին», - ասել է չեչեն անջատողականների ղեկավարը։