«Եվրանեսթ»-ի խորհրդարանական վեհաժողովի հայկական պատվիրակությունը մեկնել է Բաքու

Այսօր, օրվա երկրորդ կեսին, «Եվրանեսթ»-ի խորհրդարանական վեհաժողովի հայկական պատվիրակությունը մեկնել է Բաքու՝ մասնակցելու այնտեղ ապրիլի 2-ից 4-ը կայանալիք «Եվրանեսթ»-ի լիագումար նիստին: Այդ մասին Panorama.am-ին փոխանցել է ԱԺ պատգամավոր, «Եվրանեսթ»-ի Խորհրդարանական վեհաժողովում Սոցիալական, կրթության, մշակույթի և քաղաքացիական հասարակության հարցերի հանձնաժողովի նախագահ Արտակ Զաքարյանը:

Ավելի վաղ, Զաքարյանը տեղեկացրել էր, որ պատվիրակությունը Բաքու մեկնելու է ամբողջ կազմով: Պատվիրակության կազմում են՝ Վահան Հովհաննիսյանը, Արտակ Զաքարյանը, Արա Նռանյանը, Լիլիթ Գալստյանը, Հովհաննես Սահակյանը, Արամ Սաֆարյանը, Նաիրա Զոհրաբյանը, Ստեփան Սաֆարյանը, Խաչիկ Հարությունյանը, Մանվել Բադեյանը:

Ի սկզբանե հայտարարվել էր, որ անվտանգության նկատառումներից ելնելով, գուցե հայկական պատվիրակության ոչ ամբողջական կազմը մեկնի Բաքու և , մասնավորապես, կին-պատվիրակները' ԲՀԿ-ական Նաիրա Զոհրաբյանն ու ՀՅԴ-ական Լիլիթ Գալստյանը չմասնակցեն ապրիլին կայանալիք նիստին: Սակայն հետագայում որոշում կայացվեց, որ կմեկնի ամբողջական կազմը' բացառելու հակահայկական քարոզչությունն ու հատկապես' դրա տոնայնությունը քննարկվող ու ընդունվելիք բանաձևերում: