Համաքաղաքային շաբաթօրյակը` ապրիլի 14-ին

Երևանի քաղաքապետարանում տեղի ունեցած հերթական աշխատանքային խորհրդակցության ընթացքում, որը վարել է Երևանի քաղաքապետի տեղակալ Կամո Արեյանը, նշվել է, որ նախապատրաստական աշխատանքներ են տարվում ապրիլի 14-ին կայանալիք համաքաղաքային շաբաթօրյակն ու ծառատունկը պատշաճ մակարդակով կազմակերպելու համար, ինչպես նաև համատիրությունների միջոցով բնակչության իրազեկման և այդ աշխատանքներում երևանցիներին հնարավորին ներգրավելու ուղղությամբ: Շաբաթօրյակին ընդառաջ, հանձնարարվել է այդ նպատակով բնակչությանն ապահովել անհրաժեշտ բոլոր գործիքներով:

«Երևանը բոլորիս տունն է, և մեզնից յուրաքանչյուրը պետք է մասնակցի իր բակի ու տան հարակից տարածքի մաքրման ու կանաչապատման աշխատանքներին»,- փոխանցելով քաղաքապետ Տարոն Մարգարյանի հորդորը' նշել է Կամո Արեյանը:

Բնապահպանության վարչության պետին հանձնարարվել է սեղմ ժամկետում ավարտել ծաղկող թփերի ձեռքբերման և տնկման աշխատանքները:

Անդրադառնալով սեփական եկամուտների հավաքագրման գործընթացին և ցուցանիշներին' հանձնարարվել է ուշադրության կենտրոնում պահել աղբահանության վարձավճարների գանձման ընթացքը և բնակչությանն իրազեկել պարտադիր վճարումների մասին' զգուշացնելով, որ չվճարելու դեպքում կկիրառվեն օրենքով սահմանված տույժեր և տուգանքներ:

Տրանսպորտի վարչության պետը զեկուցել է, որ շարունակվում է հասարակական տրանսպորտի սպասարկման որակի նկատմամբ ամենօրյա վերահսկողությունը: Արձանագրված խախտումների մասով կազմվել են վարչական արձանագրություններ: Զեկուցվել է նաև, որ, ներքաղաքային կանոնավոր ուղևորափոխադրումների նոր երթուղային ցանցի հաստատմանը զուգահեռ, համապատասխան աշխատանքներ են տարվել այդ մասին բնակչության իրազեկումն ապահովելու ուղղությամբ:

Համապատասխան օղակների համակարգողներին փոխանցելով քաղաքապետ Տարոն Մարգարյանի հանձնարարականը' Կամո Արեյանը նշել է, որ մինչև ապրիլի 7-ը ավարտեն մայրաքաղաքի գերեզմանատներ տանող ճանապարհների փոսալցման ու ճաքալցման աշխատանքներն ու խստորեն հետևեն դրանց կատարման ընթացքին: Բացի այդ, ամենօրյա հսկողություն սահմանեն տվյալ տարածքների սանիտարական մաքրման և աղբահանության պատշաճ կազմակերպման ուղղությամբ:

Անդրադառնալով մայրաքաղաքում անօթևանների հաշվառման ու համապատասխան հաստատություններում տեղավորման ծրագրային աշխատանքների ընթացքին' սոցիալական ապահովության վարչության պետը զեկուցել է, որ դեկտեմբերից մինչ օրս հայ-դանիական «Հանս Քրիստիան Կոֆոեդ» բարեգործական հիմնադրամ է տեղափոխվել և շուրջօրյա խնամքի տակ անցել 73 անօթևան: Զեկուցվել է, որ նրանց մի մասը հարազատների կողմից, մյուսներն էլ, հանդիսանալով մարզերի բնակիչներ, տեղափոխվել են իրենց բնակության վայրեր, ևս մի հոգի' Ռուսաստանի Դաշնության քաղաքացի, ընտանիք է վերադարձել «Սպասիր ինձ» հաղորդաշարի միջոցով:

Անօթևաններից ոմանք, աշխատանքի անցնելով, վերադարձել են ինքնուրույն կյանքի, մի քանիսն էլ տեղափոխվել են տուն-ինտերնատ: Զուգահեռաբար, վարչական շրջանների զբավածության տարածքային կենտրոնների հետ աշխատանքներ են տարվում անօթևանների աշխատանքի տեղավորման ուղղությամբ:

Հանձնարարվել է նաև մինչև ապրիլի 15-ը ապահովել Աբովյան փողոցի սահմանված հատվածում Ալեքսանդր Մանթաշյանի, ինչպես նաև Մոսկովյան - Տերյան փողոցների հատման հարակից տարածքում «Մշո ճառընտիրը փրկող կանայք» կոմպոզիցիոն արձանների պատվանդանների պատրաստումն ու տեղադրումը:

Երևանի քաղաքապետարանի տեղեկատվության
և հասարակայնության հետ կապերի վարչություն