Թուրքիայում վերականգնվել է Twitter-ի հասանելիությունը

Թուրք պաշտոնյաները հայտարարել են, որ Twitter-ը շուտով հասանելի կլինի, հայտնում է Reuters-ը:

Երկուշաբթի՝ ապրիլի 6-ին, թուրքական իշխանություններն արգելափակել են մի քանի ռեսուրս` ահաբեկիչների կողմից տեղադրված լուսանկարները չհեռացնելու պատճառով: Լուսանկարում պատկերված էր դատախազ Սելիմ Քիրազին՝ պատանդառության պահին:

Twitter սոցիալական ցանցը բավարարել է իշխանությունների պահանջները և հեռացրել այդ լուսանկարները: Facebook-ը խուսափել է արգելափակումից` անմիջապես հեռացնելով լուսանկարները: YouTube-ի հասանելությունը դեռևս փակ է, քանի որ պահանջները դեռ չեն իրականացվել:

Թուրքիայի նախագահի մամուլի քարտուղարն այս առումով հայտարարել է, որ տվյալ արգելափակումը խոսքի ազատության խախտմանն ուղղված գործողություն չէր: Նա նշել է, որ հանգուցյալի հարազատներին տհաճ էր տեսնել այդ լուսանկարը, որը հասանելի էր բոլորին, բացի այդ, նման նյութերի տեղադրումը կարելի է համարել ծայրահեղական քարոզչություն:

Ստամբուլի դատախազության աշխատակից Մեհմեթ Սելիմ Քիրազին մարտի 31-ին հենց դատարանի դահլիճում պատանդ էին վերցրել «Ազգային-ազատագրական հեղափոխական կուսակցություն» խմբավորման գրոհայինները:

Թուրք ուժայինները կարողացել են ազատ արձակել դատախազին, սակայն նա մահացել է հիվանդանոցում` ստացած վնասվածքների հետևանքով: