Ես բոլորի հետ էլ լավ հարաբերությունների մեջ եմ, Նիկոլի հետ էլ. Սամվել Ալեքսանյան

«Հայկական Ժամանակ» օրաթերթի գլխավոր խմբագիր Նիկոլ Փաշինյանի կողմից արված բանավեճի առաջարկը ընդունել-չընդունելու մասին որոշումը գործարար Սամվել Ալեքսանյանը դեռ չի կայացրել: «Երկիր»-ի հետ զրույցում Ալեքսանյանը նշել է, որ նոր է վերադարձել Դուբայից և դեռ չի հասցրել մտածել ու որոշում կայացնել:

-Պարոն Ալեքսանյան, երևի տեղյակ եք, որ թիվ 7 ընտրատարածքում իր թեկնածությունն էր առաջադրել նաև Րաֆֆի Հովհաննիսյանը. հաշվի առնելով Ձեր լավ հարաբերությունները, կցանկանայինք իմանալ' ո՞ւմ հետ Ձեզ ավելի հաճելի կլիներ պայքարել՝ Հովհաննիսյանի՞, թե՞Փաշինյանի:

-Ես ոչ մեկի հետ էլ պրոբլեմ չունեմ:

-Նաև Փաշինյանի՞, նրա հե՞տ էլ եք լավ հարաբերությունների մեջ:

-Ես բոլորի հետ էլ լավ հարաբերությունների մեջ եմ, Նիկոլի հետ էլ:

-Բայց նրա վերջին ասուլիսից, անկեղծ ասած, տպավորությունն այնպիսին չէր, որ լավ հարաբերությունների մեջ եք:

-Դե, ես ի՞նչ անեմ, որ ինքն իրան էդ ձև ա պահում, ես ի՞նչ ասեմ:

-Ո՞ր դեպքում կհամաձայնեք բանավիճել նրա հետ:

-Հավեսից ա կախված, իմ ժամանակից...

-Անցած հարցազրույցի ժամանակ ասացիք, որ ընտրակաշառք չեք բաժանելու:

-Բայց ինձ փող որտեղի՞ց, որ բաժանեմ: Համ էլ օրենքով չի թույլատրվում:

-Բայց եթե չբաժանեք, կանցնե՞ք:

-Ես պրոբլեմ չունեմ: Ժողովուրդը ինձ սիրում ա:

-Ըստ Ձեզ, Նիկոլ Փաշինյանն ինչքա՞ն ձայն կհավաքի:

-Էդ հարցն էլ պետք ա ժողովրդին տաս, բայց ես գիտեմ, որ ոչ մի բան էլ չի հավաքելու: Իմ համայնքի ամեն մի խնդրին ես տեղյակ եմ ու լուծել եմ: Համայնքի բնակիչների 90 տոկոսին դեմքերով գիտեմ...

-Փաշինյանից բացի, ևս 2 մրցակից ունեք:

-Այո, ու իմ մրցակիցը Նիկոլը չի, իմ միակ մրցակիցը Վարդան Վարդանյանն ա:

-Անդրադառնալով Ռուբեն Հայրապետյանին, փաստորեն, կարողացաք համոզել:

-Ինքը իմ ընկերն ա, իմ ախպերն ա, զրուցել ենք իրար հետ ու համաձայնվել ա:

-Ո՞նց համոզեցիք:

-Գաղտնիք ա, չեմ բացի:

-Լավ, վերջում ինչ կասեք, համոզվա՞ծ եք, որ հաղթելու եք ընտրությունների ժամանակ:

-Հաղթելու եմ, Փարվանայում էլ քեֆ եմ անելու, Նիկոլին էլ կանչելու եմ քեֆի ու քանի որ լավ ա խոսում, իրան թամադա եմ դնելու: