«Եվրանեսթ»-ի ԽՎ-ն վերածվեց պատմության անբարեխիղճ ընթերցման. Վահան Հովհաննիսյան

«Եվրանեսթ»-ի լիագումար նիստում Ադրբեջանի նախագահ Իլհամ Ալիեւի ոչ կոռեկտ ելույթի կապակցությամբ Հայաստանի պատվիրակության ղեկավար Վահան Հովհաննիսյանը գրավոր ներկայացրել է մեր պատվիրակության բողոքը այդ ելույթի կապակցությամբ: Փաստաթղթում ասված է հետևյալը. «Ես կցանկանայի հետ կանչել այն նամակը, որը ուղարկել եմ Բյուրոյի բոլոր անդամներին մինչեւ «Եվրանեսթ»-ի երկրորդ լիագումար նիստը, որը տեղի ունեցավ Բաքվում:

Ես փորձել եմ զգուշացնել Բյուրոյի բոլոր անդամներին, որ այս Վեհաժողովը կարող է չարաշահվել Ադրբեջանի իշխանությունների կողմից, ովքեր հայտարարություններ կարող են անել' վնասելով համագործակցության հիմնական ոգուն:

Ցավոք, մենք Բաքվում ականատես եղանք այն բանին, ինչը կանխատեսվում էր. «Եվրանեսթ»-ի ԽՎ-ն վերածվեց պատմության անբարեխիղճ ընթերցման եւ միջազգային իրավունքի կողմնակալ մեկնաբանման վրա հիմնված հակահայկական քարոզչության դաշտի:

«Եվրանեսթ»-ի հայկական պատվիրակությունը հայտնում է իր խորին դժգոհությունը Ադրբեջանի կողմից հյուրընկալության արտոնությունները չարաշահելու կապակցությամբ: Մենք կոչ ենք անում Վեհաժողովին՝ ավելի զգուշորեն ընտրել անցկացման վայրը, որպեսզի չհնչեն հայտարարություններ, որոնք կարող են ոչնչացնել փոխըմբռնման, համագործակցության ոգին, որը մենք ձեռք ենք բերել՝ բազում խնդիրներ հաղթահարելով:

Վախենում եմ, որ այդ խնդիրները վերադառնում են:

Հարգանքներով՝

Վահան Հովհաննիսյան

«Եվրանեսթ»-ի ԽՎ Բյուրոյի անդամ, «Եվրանեսթ»-ի ԽՎ-ում հայաստանյան պատվիրակության ղեկավար»։

Հիշեցնենք, որ այսօր առավոտյան Արևելյան գործընկերության Եվրանեսթ խորհրդարանական վեհաժողովի լիագումար նիստին ուղերձ հղած Ադրբեջանի նախագահ Իլհամ Ալիևը հայերին անվանել է «ֆաշիստներ», ինչի կապակցությամբ Բաքվում գտնվող հայաստանյան պատվիրակությունը պահանջել է Եվրանեսթի կազմակերպիչներից գնահատական տալ Ադրբեջանի նախագահի ելույթին: