Թուրքիայի ԱԳՆ-ն` ԵԽ ընդունած բանաձևի մասին

Թուրքիայի արտաքին գործերի նախարարությունը նախընտրել է Եվրոպայի խորհրդարանում Հայոց ցեղասպանության մասին բանաձևի ընդունմանն արձագանքել մեղադրանքներով և եվրոպացի խորհրդարանականներին խորհուրդներ տալով: Ինչպես հաղորդում է «Արմենպրես»-ը, Թուրքիայի ԱԳՆ կայքում հրապարակված հայտարարության մեջ պաշտոնական Անկարան ոչ միայն չի ցանկացել հետևություններ անել, այլ մեղադրել է Եվրախորհրդարանի «1915 թվականի հարցում պատմությունը վերաշարադրելու մտադրություն ունենալու» համար:

Թուրքիայի արտաքին քաղաքական գերատեսչությունում նշել են, իբր իրենք լուրջ չեն ընդունում «պատմությունն ու իրավունքը սպանող այս փաստաթուղթն ընդունողներին»: «Եվրոպայի խորհրդարանի կողմից 1915-ի դեպքերի նկատմամբ ցուցաբերած այս ընտրողական և միակողմանի որոշումը, որը հակառակ է կառույցի հիմնադրման արժեքներին, վնասելու է Թուրքիայի և ԵՄ-ի հարաբերություններին և հեռու է լինելու Թուրքիայի և Հայաստանի միջև առկա խնդիրներին լուծում բերելուց»,- նշվում է ԱԳՆ հաղորդագրության մեջ: Թուրքական կողմը ոչ միայն վիրավորանքներով է մեկնաբանել որոշու մը, այլև նշել է. «Եթե Եվրախորհրդարանը ցանկանում է նպաստել Եվրոպայի ժողովուրդների շրջանում համատեղ ապագայի կառուցմանը, ապա պետք է գիտակցի, որ դա հնարավոր է առանց տարբեր կրոններն ու մշակույթն օտարելու»:

Հաղորդագրությունը թուրքական կողմը եզրափակել է մեղադրական խորհուրդներով. «Ավելի օգտակար կլինի, որ Եվրոպայի խորհրդարանի անդամները, նախքան 1915-ի խնդրով հետաքրքրվելը, առերեսվեն սեփական պատմության, հատկապես Առաջին և Երկրորդ համաշխարհային պատերազմների ժամանակ մարդկության ամենասարսափելի ողբերգություններում ունեցած իրենց դերակատարության և պատասխանատվության հետ»: