Կապանի արվեստի պետական քոլեջի սաների գիտաճանաչողական այցը մայրաքաղաքի և մարզկենտրոնների մշակութային օջախներ

ՀՀ մշակույթի նախարարության նախաձեռնությամբ ու ֆինանսավորմամբ ս. թ. մարտի 30-ից ապրիլի 1-ը իրականացվել է «Երեխաների և պատանիների համար գիտաճանաչողական ուղևորությունների կազմակերպում մայրաքաղաքի և մարզկենտրոնների թանգարաններ, պատկերասրահներ, համերգային և այլ մշակութային կազմակերպություններ» ծրագիրը: Այս անգամ ծրագրում ընդգրկվել էին «Կապանի արվեստի պետական քոլեջ»-ի սաները՝ շուրջ 27 ուսանող: ՀՀ մշակույթի նախարարության մշակութային ծրագրերի շարքում սույն ծրագիրն առանձնահատուկ տեղ է գրավում, և միտված է մարզերում բնակվող երեխաների՝ մայրաքաղաքի մշակութային կյանքին հաղորդակցվելու մատչելիության ապահովմանը:

Ծրագրի շրջանակներում ուսանողները գիտաճանաչողական այցելություն են կատարել Երևանի մշակութային օջախներ՝ Պ. Սևակի, Ս. Փարաջանովի, Մ. Սարյանի, Ա. Խաչատրյանի տուն-թանգարաններ, Հայաստանի ազգային պատկերասրահ, Էջմիածին և Նորավանք: Ծրագրի մասնակիցները մարտի 30-ին Ալ. Սպենդիարյանի անվան օպերայի և բալետի ազգային ակադեմիական թատրոնում դիտել են Սերգեյ Պրոկոֆևի «Ռոմեո և Ջուլիետ» բալետը, մարտի 31-ին ունկնդրել՝ Հայաստանի պետական ֆիլհարմոնիկ նվագախմբի համերգը: Մասնակիցները ներկա են գտնվել նաև մեծանուն կոմպոզիտոր Ալ. Հարությունյանի հրաժեշտի արարողությանը: