Սա օգտագործվելու է ՀՀԿ-ի դեմ, որպես ազատ և թափանցիկ ընտրություններ չկամեցող ուժ. Արմեն Բադալյան

«Ես չեմ կարող ասել, թե ինչո՞ւ չի ստորագրվել, որովհետև ՀՀԿ-ի որոշման հետ ծանոթ չեմ, բայց կարող եմ ասել, որ սա հաստատ օգտագործվելու է ՀՀԿ-ի դեմ, որպես ազատ և թափանցիկ ընտրություններ չկամեցող ուժ»,- այսօր Լուրեր.com-ի հետ զրույցում մեկնաբանելով «ՀՀԿ-ի միասնական շտաբ ձևավորելու մասին համաձայնագիրը չստորագրելը»՝ ասաց քաղաքական և ընտրական տեխնոլոգիաների փորձագետ Արմեն Բադալյանը, և հավելեց, որ և՛ ընդդիմադիր, և՛ կոալիցիոն գործընկերների կողմից սա անպայման կօգտագործվի:

Հիշեցնենք, որ այսօր Հայ Ազգային Կոնգրեսը, ՀՅԴ-ն, ԲՀԿ-ն և «Ժառանգություն»–ը ստորագրել են ընտրությունների վերահսկման միասնական շտաբ ձևավորելու մասին համաձայնագիր: Համաձայնագիրը հրաժարվել է ստորագրել ՀՀԿ ներկայացուցիչ Գալուստ Սահակյանը:

Արմեն Բադալյանը նշեց նաև, որ հնարավոր է ՀՀԿ-ն պատճառ ուներ չստորագրելու. «Իսկ գուցե պատճա՞ռ ուներ չստորագրելու, որովհետև միգուցե այդքան էլ մտադրված չէր արդար և թափանցիկ ընտրություններ անցկացնելուն, իսկ ձևավորված շտաբի արդյունավետ աշխատանքը կարող էր էապես խախտել ՀՀԿ-ի «պլանները»»,-ասաց Բադալյանը:

Հարցին՝ «թե համամասնականով առաջադրված ո՞ր կուսակցությունները կստորագրեն համաձայնագիրը», Արմեն Բադալյանն ասաց. «Բնականաբար ՕԵԿ-ը չի ստորագրելու, քանի որ ՕԵԿ-ը լսում է՝ Հանրապետականը ինչ է ասում, որ ըստ այդմ էլ կատարի: Իսկ մնացածը՝ Կոմկուսը, Դեմկուսը... այլընտրանք չեն ներկայացնում, որ ստորագրեն կամ չստորագրեն»:

Արմեն Բադալյանի խոսքերով հիմնական խաղացողները ՀԱԿ, ՀՅԴ, ԲՀԿ, «Ժառանգություն» կուսակցություններն են, որոնք, համախմբելով իրենց ռեսուրսները, կարող են արդյունքի հասնել:

«Նրանք, համախմբելով իրենց մեդիա ռեսուրսները, վարչական ռեսուրսները, կարող են արդյունքի հասնել: Քանի որ իրենց համար խիստ կարևոր է արդար, թափանցիկ ընտրություններ անցկացնելը՝ հատկապես վիրտուալ ընտրողների հետ կապված, որոնք ինչպես տեսնում ենք 100.000-ներով ավելանում են ցուցակներում»,-ասաց Արմեն Բադալյանը: