Ինչպես ստացվեց, որ «32 ատամ» ակումբի տղաները բաժանվեցին. մեկնաբանում է «Վիտամին» ակումբի Արմուշը

«Վիտամին» ակումբի դերասան Արման Խաչատրյանի հետ զրուցել է «Ժողովուրդ» օրաթերթը: Զրույցը ներկայացնում ենք ստորև.

-Թույլ տալի՞ս եք, որ Ձեր որդին նայի Ձեր հումորը:

-Իհարկե, թույլ եմ տալիս նաև, որ «Կարգին սերիալ»-ը՝ Հայկոյին ու Մկոյին էլ նայի:

-Ձեր կինն ինչպե՞ս է վերաբերում հումորիստի Ձեր աշխատանքին:

-Կինս էլ դեմ չէ, մինչ ամուսնանալը գիտեր ում հետ է ամուսնանում, պատրաստ էր ուշ տուն վերադարձող ամուսին ունենալուն: Ինքն իմ աշխատանքը շատ է գնահատում, ես էլ իրեն եմ պաշտում, սիրում շատ: Ինքը նաև մեր նկարահանումներին է գալիս երեխայի հետ:

-Քննադատություն լինո՞ւմ է նրա կողմից:

-Բա իհարկե, մանավանդ իմ խոսակցականի վերաբերյալ: Ասում է՝ ատամներիդ արանքից մի՛ խոսա, կուզիկ մի՛ կանգնի, այս հումորը պետք չէր անել...

-«Քոմեդի քլաբ»-ը բոլորս էլ նայում ենք, չի՞ պատահել, որ ասեն՝ նմանակում եք:

-Վա՜յ, ես էլ եմ նայում, գժվում եմ իրանց համար: Էդ էտապն արդեն անցել ենք, երբ մեզ նմանատիպ բաներ էին ասում: Ինչպես հումորը կարող է զուգադիպել, այնպես էլ երաժշտությունը, նկարչի ոճը և այլն: Մենք չենք նմանակում, այլ ստեղծում ենք մերը:

-Ձեր ակումբի ելույթների ժամանակ հայտնի մարդկանց եք հրավիրում, պատահ՞լ է, որ մերժեն, չգան:

-Միայն այն դեպքում, երբ աշխատանքի ժամերը չեն համընկնում մեր դրած նկարահանման օրվան: Մենք չենք նեղանում, նորմալ է, մարդն աշխատում է:

-Իսկ միգուցե վախենու՞մ են, որ իրենք էլ Ձեր հումորի զոհը կդառնան:

-Դա «32 ատամ»-ի ժամանակ էր: Առաջին տարին էր, երբ շատ քչերն էին ռիսկով գալիս: Բայց հետո հասկացան, որ գալիս են ուրախանալու, ու դրա մեջ վատ բան չկա: Հիմա դեպքեր են լինում, երբ նեղանում են, թե ինչու չրենց մեզ մոտ հյուր չենք կանչում:

-Կատակից նեղացողներ եղե՞լ են:

- Երբ նոր էինք սկսել իրենց վրա հումոր անել, շատերն էին նեղվում: Բայց հասկացան, որ սա հումոր է, ու պետք է կարողանաս ինքդ քո վրա ծիծաղես: Նրանք սկսել են հասկանալ մեր հումորը, տեսնում են՝ մեր ասածի տակ չարություն չկա:

-Ձեր սիրելի, ցանկալի հյուրի անունը կնշե՞ք:

-Անդրե:

-Ինչո՞ւ նրա հումորը յուրահատուկ է:

-ինքը շատ հումորով մարդ է, որ նրա հետ տված էներգիան շատ ուրիշ է: Երբ ինքը նստած է լինում ակումբում ու քո ասած հումորին նույն կերպ ուրախ պատասխան տալիս, ավելի դուխով ես խաղում: Նույնն էլ Ավետ Բարսեղյանի դեպքում է:

-Դուք «32 ատամ» ակումբի հիմնադիրներից էիք, ինչպես ստացվեց, որ մնացիք «Վիտամին» ակումբի տղաների հետ:

-Այստեղ հեռուստաընկերության խնդիր էր: Մեզ դուր չեկավ աշխատելաձևն «Արմենիա TV»-ում: Մեծամասնության մոտ այդ կարծիքը գերիշխեց, ու մենք գնացինք: Եթե մեր ընկերներից երկուսը նախընտրել են մնալ այնտեղ ուրեմն վե՞րջ, մենք մեծ մարդիկ ենք, առողջ մտածելակերպ ունենք, ով որտեղ ուզեց՝ մնաց:

-Ստացվեց, որ հեռուստաընկերությունները «կռիվ գցեցին» ձեր մեջ:

-Չէ´, չէ´, չէ´, մենք կռիվ չենք ունեցել, հասուն մարդկանց պես ճիշտ գնահատեցինք իրավիճակն ու չոտնահարեցինք յուրաքանչյուրիս իրավունքը: Եթե մարդ իր ապագան տեսնում է այդտեղ, դու իրավունք չունես դնել քո ընկերությունը, տենց բան չի կարելի:

-Իսկ շփումը Վահագնի ու Կարենի հետ շարունակվո՞ւմ է:

-Ավելի է քչացել, իրենք էլ ամեն օր ստեղծագործում են, սցենար են գրում, մանավանդ, որ հիմա իրենք քիչ են, իրենց գործն ավելի բարդ է: Հումորը բարդ ժանր է, պետք է կարողանաս ամեն շաբաթ մի նոր բանով հանրությանը ծիծաղեցնել:

-Ասում եք՝ ընկերական հարաբերությունները պահպանվել են, բայց մենք ձեզ երբեք չենք տեսել նրանց ակումբում, նրանց էլ՝ ձեր:

-Հեռուստաընկերության խնդիր է, Դուք էլ նոր մարդ չեք, գիտեք, որ մի հեռուստաընկերությունը չի ուզում իր մարդուն տեսնել մյուս հեռուստաընկերությունում:

-«Վիտամին» ակումբի ելույթները միայն հեռուստատեսային տարբերակնե՞րն են, թե նաև ակումբային ելույթներ էլ եք ունենում առանց նկարահանումների:

-Ինչ «Վիտամին»-ը ստեղծել ենք, ակումբային տարբերակ դեռ չենք արել: Մենք մեր առաջ խնդիր ունեինք՝ հագենալ տեխնիկապես, որակյալ ելույթներ ապահովել, իսկ ակումբային ելույթները շատ էներգիա են տանում: Կայանալու հարց կար, դա 1 տարի տևեց, կես տարի է, որ սկսել ենք շնչել: Շատ ձեռքբերումներ ունենք, մենք ունենք մեր տեխնիկան, մեր կռանը, մեր կամերաները: Թիմային աշխատանքի շնորհիվ ենք ձեռք բերել այդ ամենը: Մենք միասին կառուցել ենք ու շարունակում ենք կառուցել:

-Քանի որ Դուք իրենց ավագ ընկերն եք, կասե՞ք, թե տղաներից ով է ամենաէնտուզիազմովը:

-Ասեմ, բոլորն են ակտիվ բայց ամենաէնտուզիազմովը մեր գլխավոր սցենարիստն է՝ Ռոբերտը, ով պահանջում ու պարտադրում է, որ մենք էլ լինենք էնտուզիազմով:

-Նկատել եմ նաև մի բան, որ «Վիտամին»-ում աղջիկ չկա:

-Մենք ծանր չենք տանում, եթե աղջկա դեր է լինում, ունենք հրաշք ընկերուհի՝ դերասանուհի Անահիտ Կիրակոսյան, ում հրավիրում ենք:

-Այսքան խոսեցինք աշխատանքից, իսկ անձնապես Դուք ինչի՞ կարիք ունեք:

-Իմ ցանկությունն է, որ ոչ մեկ երկրից չբացակայի: Ով էլ կա քաղաքում, կարողանա «ներողություն» ասել: Կարևոր է առանց բռունցքների հարցերին լուծում տալ: Ես էլ ամեն ինչ անում եմ, որ ուրախացնեմ: Պետք է հետք թողնենք, որ մեզ լավով հիշեն: