Ֆեմինիստները դեմ են «Միսս աշխարհ»–ին, Մանդելան՝ կողմ

«Միսս աշխարհ»–ին սպասում և հետևում են միլիոնավոր մարդիկ ամբողջ աշխարհում, սակայն 1961-ից անցկացվող այս մրցույթը ոչ միայն երկրպագուներ ունի։ Ամեն տարի հայտնվում են նաև բազմաթիվ քննադատողներ։

Այս տարին էլ բացառություն չեղավ, և մի քանի քարոզչական, խմբեր, այդ թվում՝ Լոնդոնի ֆեմինիստական ցանցը և Միացյալ Թագավորության ֆեմինիստները, հայտնեցին իրենց դժգոհությունը։ 

Նրանց կայքերում հայտնվել էին հայտարարություններ, որոնք կոչ էին անում միանալ մրցույթի անցկացման ժամանակ կայանալիք բողոքի ակցիային։ Զայրացած այն փաստից, որ մրցույթն անցկացվում է Լոնդոնում, ֆեմինիստները կոչ էին արել իրենց համակիրներին  պաստառներով հավաքվել և իրենց բողոքի ձայնը բարձրացնել, իրենց բնորոշմամբ, «կանանց հավասարության դեմ գործվող սարսափելի հանցանքի դեմ»։ 

«Միսս Անգլիա» գրասենյակի տնօրեն Անջի Բիսլին համաձայն չէ այդ բնորոշման հետ։ Նա հայտարարել է, որ մրցույթը ժամանակի ընթացքում փոխվել է, և հիմա այն այլևս միայն լողազգեստով գեղեցիկ երևալը չէ։

«Այժմ կան տաղանդի, սպորտի և գեղեցկությունը հանուն նպատակի մրցույթները։ Այս վերջինը դրամահավաք ֆոնդ է։ Աղջիկները սիրով են մասնակցում դրանց։ Ճիշտ է, նրանք պետք է հրաշալի տեսք ունենան հաղթելու համար, բայց սա շատ ավելին է, քան գեղեցկության մրցույթը։ Այդ մարդիկ պետք է մեզ հնարավորություն տան, ոչ թե մտածեն, թե սա պարզապես լողազգեստների շքերթ է;

Մենք ազատ հասարակությունում ենք ապրում, ուր կինը ընտրության իրավունք ունի։ «Միսս աշխարհի» մասնակիցներն իրենք են որոշում՝՝մասնակցել, թե ոչ, և ցուցարարները չպետք է քննադատեն այդ որոշումը։ Եթե չեք հավանում՝ մի նայեք»,–ասել է Անջի Բեսլին։

Այս տարվա «Միսս աշխարհը» նաև «ուղեղների մրցույթ» է, քանի որ մասնակիցների կեսից ավելին սովորում է մագիստրատուրայում, մեկ քառորդն արդեն ավարտել է, իսկ կեսից ավելին խոսում է առնվազն երեք լեզվով։

Մրցույթին աջակցում է նաև Նելսոն Մանդելան։ Եզրափակչի ընթացքում ընթերցվեց նրա ուղերձը, ուր Մանդելան ողջունում և  շնորհավորում էր բոլոր մասնակիցներին։