Սիրիական բանակը Հասաքեի մարզում հաջողություններ է գրանցել

Սիրիական բանակը և ազգային պաշտպանական ջոկատներն ապրիլի 28-ին վերահսկողություն են հաստատել Հասաքեի մարզում գտնվող Դաուդիա գյուղի վրա:

Ինչպես հաղորդում է «Արմենպրես»-ը՝ վկայակոչելով լիբանանյան «Ալ Մայադին» գործակալությունը, բախումների ժամանակ տասնյակ ահաբեկիչներ են սպանվել ու վիրավորվել:

Աղբյուրի տեղեկացմամբ՝ Սիրիայի կառավարության և «Կարմիր մահիկ» կազմակերպության ջանքերով մարդասիրական օգնության 20 բեռնատարներ մտել են Դամասկոսի մերձակայքում գտնվող Յալդա գյուղ՝ օգնություն բաժանելու պաղեստինցի գաղթականներին:

Մարդասիրական օգնություն է տրամադրվել նաև Իդլիբ նահանգի Արիհա քաղաքի բնակիչներին: Օգնության փաթեթների մեջ հիմնականում ալյուր և տարբեր տեսակի մթերքներ են:

ՍԱՆԱ գործակալության տեղեկացմամբ, Դարաա և Սույդա նահանգների միջև գտնվող Բարակ գյուղում ահաբեկիչները լուրջ կորուստներ են կրել: Նրանցից շատերը սպանվել են, ոմանք՝ ձերբակալվել:

«Ջաբհա ան Նուսրա» խմբավորման տասնյակ անդամներ սպանվել են Դարաա քաղաքի Քասարա գյուղում: Խմբավորման մեծ թվով անդամներ սպանվել են Դամասկոսի Բեյթ Թեյմա և Խան Շեյխ բնակավայրերում:

ՄԱԿ-ի տվյալներով՝ սիրիական հակամարտության չորս տարում զոհվել է ավելի քան 220 հազար մարդ: Սիրիական բանակը շարունակում է պայքարել ահաբեկչական տասնյակ խմբավորումների դեմ՝ փորձելով վերականգնել երկրի կայունությունն ու անվտանգությունը: