ԵԿՄ նախկին անդամի չարաշահումները քրգործի հարուցման հի՞մք կարող են դառնալ

Այսօր «Հայկական Ժամանակ» օրաթերթում հրապարակված տեղեկատվության համաձայն, լարվածությունը «Երկրապահում» շարունակվում է: Թերթի տեղեկություններով, առաջիկայում այդ կառույցից էլի մարդիկ են դուրս գալու:

ԵԿՄ Կենտրոն տարածքային բաժանմունքի նախկին ղեկավար Արտաշես Գյումրյանը երեկ «ՀԺ»-ի թղթակցին հայտնել է, որ ԵԿՄ նախագահ Մանվել Գրիգորյանի մարդիկ փորձում են կոնֆլիկտային իրավիճակ ստեղծել:

ԵԿՄ մամլո պատասխանատու Վարդան Վարդանյանն, անդրադառնալով հարցին, Լուրեր.com-ի հետ զրույցում ասաց. «Գյումրյանը խոսում է առանց փաստերի, իսկ ԵԿՄ-ի անդամներն ունեն փաստաթղթեր, որոնք վկայում են Գյումրյանի չարաշահումների մասին: Մարդիկ ցույց են տալիս փաստաթղթեր, որոնք վկայում են, թե ինչի է վերածված եղել այդ կառույցը: Այնտեղ ֆինանսկան չարաշահումների մասին կոնկրետ փասթաթղթեր կան: Մարդիկ 12 տարի շարունակ ամսեկան 300.000-500.000 նվիրատվություն են արել Կենտրոն կառույցին, ու Գյումրյանը նրանց ստացականներ է տվել: Բայց այդ գումարները ո՛չ հասել են կարիքավոր ընտանիքներին, ո՛չ էլ իրենց հաշվետվություններում են երևում այդ գումարները: Այսինքն՝ դա կարող է նաև քրեական գործի հիմք հանդիսանալ»:

Իսկ թե ինչո՞ւ ԵԿՄ-ն չի դիմել դատախազություն՝ Գյումրյանի դեմ քրեական գործ հարուցելու նպատակով, Վարդան Վարդանյանն ասաց. «Եթե իրավապահները ուզեն՝ թող իրենք հարուցեն»:

Լուրեր.com-ը զրուցեց նաև ՀՀ Ոստիկանության և ՀՀ դատախազության մամուլի պատասխանատուների հետ, որոնք նշեցին, որ վերոնշյալ չարաշահումների վերաբերյալ հաղորդումներ չեն ստացել: