Թուրքիայում ձերբակալել են «զուգահեռ պետության» գործով կասկածյալներին ազատ արձակած դատավորին

Թուրքիայում ոստիկանությունը ձերբակալել է Ստամբուլի դատարանի դատավոր Մեթին Օզչելիքին, ում որոշումով կալանքից ազատ են արձակվել երկրի ղեկավարության դեմ «դավադրության», կամ այսպես կոչված «զուգահեռ պետության» մասին գործով 76 կասկածյալները: Եվս մեկ դատավոր, նրա գործընկեր Մուստաֆա Բաշերի նկատմամբ որոնում է հայտարարվել:

Այս մասին, ինչպես հաղորդում է «Արմենպրես»-ը, հայտնում է թուրքական «Հուրիեթ» թերթը' նշելով, որ ազատ արձակվածների մեջ են նաև «գյուլենականների համայնքին» անդամակցելու մեղադրանքով ձերբակալված Սամանյոլու հրատարակչական խմբի նախագահ Հիդայաթ Քարաջան և բարձրաստիճան ոստիկաններ:

Դատավորների այդ որոշումից զայրացած թուրքական ղեկավարության հանձնարարությամբ դատախազի միջնորդությամբ բարձր ատյանի դատարանը չեղարկել է այդ որոշումը: Թուրքիայի դատավորների և դատախազների բարձրագույն խորհուրդը (HSYK) որոշում է ընդունել աշխատանքից հեռացնել Օզչելիքին և Բաշերին:

Թուրքիայում «զուգահեռ պետություն» անվանում են իշխանական կառույցներում աշխատող «Հիզմեթ» շարժման մասնակիցներին, որը ղեկավարում է ԱՄՆ-ում վտարանդիության մեջ բնակվող արդի իսլամի գաղափարախոս, ընդդիմադիր քարոզիչ Ֆաթուլլահ Գյուլենը: Անցյալ տարվա դեկտեմբերին Ստամբուլի դատարանը Գյուլենին ձերբակալելու վճիռ էր ընդունել:

Դատավորների գործողությունները բացասական են գնահատել Թուրքիայի նախագահ Ռեջեփ Թայիփ Էրդողանը և վարչապետ Ահմեթ Դավութօղլուն, որոնք նրանց մեղադրել են իրենց բնորոշմամբ' «զուգահեռ պետության» կազմակերպիչ, կրոնական գործիչ Գյուլենին ենթարկվելու մեջ' հայտարարելով, որ դատավորները գործել են Գյուլենի հանձնարարությամբ և գերազանցել են իրենց լիազորությունները:

2013 թվականի դեկտեմբերի կեսերին այդ երկիրը ցնցած կոռուպցիոն սկանդալից անմիջապես հետո, որով բացահայտվել էին թուրքական կառավարության անդամների, այդ թվում' այն ժամանակ Թուրքիայի վարչապետ Էրդողանի որդու, փեսայի և դստեր խոշոր կոռուպցիոն գործարքները, Էրդողանը հայտարարել էր, որ դրա հետևում կանգնած են ԱՄՆ-ում վտարանդի արդի իսլամի գաղափարախոս Ֆաթուլլահ Գյուլենի հետևորդները, որոնք ցանկանում են տապալել իր կառավարությունը: Էրդողանի հանձնարարությամբ աշխատանքից հեռացվել կամ ձերբակալվել են այդ կոռուպցիոն սկանդալը բացահայտած հազարից ավելի փաստաբաններ, դատախազության և ոստիկանության աշխատակիցներ: Իրավապահ և դատական համակարգերը գյուլենականներից «մաքրելու» գործընթացը Թուրքիայում շարունակվում է մինչ օրս: