Մենք մտադիր ենք նաև գինու հյուրասիրություն կազմակերպել, բայց համոզված չեմ, որ այն լավ կավարտվի

Արդեն 4 տարի է՝ նոյեմբերի 7-ն արձանագրված է որպես Հայաստանում գինու ազգային օր, սակայն սովորաբար որևէ լայնամասշտաբ միջոցառում չի անցկացվում, և շատերն այդ մասին տեղյակ էլ չեն։

Այսօր լրագրողների հետ հանդիպման ժամանակ Հայաստանի գինեգործների միության նախագահ Ա. Հարությունյանն ասաց, որ դա ամենայն հավանականությամբ Ֆրանսիայում ամեն տարվա նոյեմբերի 4-րդ շաբաթում նշվող նոր գինու տոնի նմանակն է։ Նա նաև ասաց, որ այս օրը շատ հարմար է տոնը նշելու համար, քանի որ բոլորի մոտ առաջին գինին արդեն պատրաստ է լինում։ «Այս օրվա միակ թերությունն այն է, որ համընկնում է կոմունիստական տոնի հետ»,– ասաց Հարությունյանը։

Բանախոսը նաև ասաց, որ հաջորդ տարի նախատեսվում է աննախադեպ շուքով նշել գինու տոնը։ Այդ առթիվ բանակցություններ են տարվում Պռոշյանի գինու և կոնյակի գործարանի տնօրինության հետ, քանի որ մտադրություն կա տոնի առթիվ գինով լցնել Ազնավուրի հրապարակի ավազանը, ինչպես դա անում են Իտալիայում։ «Խոսքը մոտ 10 տոննա գինու մասին է։ Մենք մտադիր ենք նաև գինու հյուրասիրություն կազմակերպել, բայց համոզված չեմ, որ այն լավ կավարտվի»,– ասաց Ա. Հարությունյանը։