Հայաստանը կանդամակցի Մանկապատանեկան գրքի միջազգային կոմիտեին /IBbY/

Ս. թ. մարտի 19-22-ը Հայաստանը առաջին անգամ մասնակցելով Իտալիայի հյուսիսում գտնվող Բոլոնիա քաղաքում կայացած մանկական գրքի միջազգային ամենամյա ցուցահանդեսին՝ մեծ հետաքրքրություն է առաջացրել այցելուների և մասնակիցների շրջանում: Հայ գրատպության 500-ամյակը և Երևանը՝ 2012 թ. գրքի համաշխարհային մայրաքաղաքը խորհրդանշող ձևավորումով հայկական տաղավարում ներկայացվել են Հայաստանում տպագրված շուրջ 250 անուն մանկական գիրք և գրքերի ձևավորումնե։ Ցուցահանդեսի ընթացքում տեղի են ունեցել՝«Հայ գրատպության 500-ամյակ» և «Երևանը՝ 2012 թ. գրքի համաշխարհային մայրաքաղաք» ծրագրերի, «Մանկական գրականությունը Հայաստանում» թեմայով, մանկագիրներ Էդվարդ Միլիտոնյանի, Նունե Սարգսյանի գրքերի շնորհանդեսները:

Ցուցահանդեսի շրջանակներում հայկական պատվիրակությունը հանդիպում է ունեցել Բոլոնիայի համալսարանի հայկական մշակույթի ամբիոնի պատասխանատուների հետ: Պատվիրակությունը գործնական տարբեր հանդիպումներ է ունեցել նաև արտերկրի իրենց գործընկերների հետ, մասնավորապես՝ Խնկո- Ապոր անվան ազգային մանկական գրադարանի տնօրեն Ռուզան Տոնոյանը հանդիպել է Մանկապատանեկան գրքի միջազգային կոմիտեի /IBbY/ պրեզիդենտի և գործադիր տնօրեն Լիզ Փեյջի հետ և քննարկել միջազգային այս հեղինակավոր կազմակերպությանը Հայաստանի անդամակցության հարցը:

Մանկապատանեկան գրքի միջազգային կոմիտեն /IBbY/ ստեղծվել է 1953 թ., Ցյուրիխում /Շվեյցարիա/: Այսօր այն միավորում է 70 երկրների ազգային կոմիտեներ: Որպես հասարակական կազմակերպություն' համագործակցում է ՅՈՒՆԵՍԿՕ-ի և ՅՈՒՆԻՍԵՖ-ի հետ և իր գործունեությունն իրականացնում է առաջնորդվելով ՄԱԿ-ի երեխաների իրավունքների պաշտպանության սկզբունքներով:

Կոմիտեն ունի Հանս Քրիստիան Անդերսենի անվան գրական մրցանակ, որը հիմնադրվել է 1956 թ. ՅՈՒՆԵՍԿՕ-ի Մանկապատանեկան գրականության միջազգային խորհրդի կողմից: Անդերսենի անվան գրական մրցանակը մանկագիրների համար ամենահեղինակավոր միջազգային մրցանակն է, որն անվանում են նաև փոքր Նոբելյան մրցանակ:

Այս հեղինակավոր մրցանակով պարգևատրվում են լավագույն մանկագիրներն ու նկարիչ-ձևավորողները: Մրցանակը՝ Անդերսենի կիսադեմով ոսկե մեդալը, ստեղծագործողներին է շնորհվում երկու տարին մեկ՝ նրանց կենդանության օրոք, Անդերսենի ծննդյան օրը՝ ապրիլի 2-ին (1967 թ. ապրիլի 2-ը հայտարարվել է Մանկական գրքի միջազգային օր): Պատվավոր դիպլոմներով պարգևատրվում են վերջին տարիներին Միջազգային խորհրդի անդամ երկրներում հրատարակված մանկական և պատանեկան լավագույն գրքերը ևս:

Երևանը գրքի համաշխարհային մայրաքաղաքի տոնակատարությունների շրջանակում հայկական կողմի հրավերով Հայաստան կայցելի IBbY-ի գործադիր տնօրեն Լիզ Փեյջը, ով պաշտոնապես կհայտարարի Մանկապատանեկան գրքի միջազգային կոմիտեին Հայաստանի անդամակցության մասին: IBbY գործադիր տնօրենի այցի շրջանակներում տեղի կունենան նաև շահագրգիռ կառույցների ու կազմակերպությունների հետ հանդիպումներ, քննարկումներ, կընթերցվեն դասախոսություններ:

Բոլոնիայի մանկական գրքի միջազգային ամենամյա ցուցահանդեսի ավարտին պետական պատվերով և աջակցությամբ հրատարակված մանկապատանեկան գրականությունից շուրջ 70 անուն գիրք հանձնել է Միլանի «Հայտուն» կազմակերպությանը: