ԵԿՄ վարչության նախագահ Մանվել Գրիգորյանի շնորհավորական ուղերձն ապրիլի 7-ի կապակցությամբ

Սիրելի մայրեր, քույրեր

Հայաստանի Հանրապետության Երկրապահ Կամավորականների Միության, միության վարչության, 5-րդ բրիգադի մարտիկների, երիտասարդ ու պատանի երկրապահների, բոլոր երկրապահ ազատամարտիկների եւ իմ անունից շնորհավորում եմ Ձեզ մայրության եւ գեղեցկության տոնի առթիվ, ցանկանում առողջություն եւ երջանկություն:

Մենք՝ երկրապահներս, գնահատում եւ արժեւորում ենք հայ կնոջ դերը, ոչ միայն երեխաների դաստիարակության, ընտանիքի ամրության, այլ նաեւ պետության կայացման եւ հզորացման գործում:

Մեր համար, հայ տղամարդու համար, մայրը, կինը, քույրը՝ սրբություն են, որ արմատավորված դարերից եկող մեր վերաբերմունքով ու մեծարմամբ պահպանվում է նաեւ այսօր: Ահա այս պատճառով էլ մայրության եւ գեղեցկության տոնը համարվում է մեր ամենասիրելի տոներից մեկը:

Մայրության եւ գեղեցկության տոնի առթիվ, իմ խորին հարգանքն ու շնորահավորանքն եմ հղում մեզ պարտադրված պատերազմում զոհված ազատամարտիկ կանանց, զոհված, անհայտ կորած ազատամարտիկների մայրերին, քույրերին, կանանց: Դուք արցախյան պատերազմի եւ անկախ պետականության կայացման օրերին, ձեր պահվածքով, անմիջական մասնակցությամբ ապացուցեցիք, որ հայ կինը երկրապահ է եւ անում է ամեն ինչ հայրենիքի ու հայի արժանապատվությունը բարձր պահելու համար:

Հատուկ շնորհավորանքներ եմ հղում Արցախի մայրերին, կանանց, ովքեր պատերազմի տարիներին դարձան հայրենիքի պաշտպաններ, միաժամանակ մնալով ընտանիքի հենարան:

Շնորհավորում եմ բոլոր այն մայրերին ու կանանց, որոնց ամուսիններն ու որդիներն այսօր հայոց բանակի շարքերում, դիրքերում պաշտպանում են պետական սահմանն ու ժողովրդի անդորրը:

Շնորհավորում եմ նաեւ սահմանամերձ բնակավայրերում ապրող, երեխա դաստիարակող ու երկիր պահող մեր հայուհիններին, ինչպես նաեւ այսօր ազգային բանակում ծառայող կանանց ու քույրերին:

Առանձնահատուկ շնորհավորանքս եմ հղում երիտասարդ ու պատանի երկրապահների մայրերին, ովքեր իրենց երեխաներին տալիս են հայրենասիրության առաջին դասերը՝ լինել ժողովրդին արժանի զավակ, երկրին տեր:

Վստահեցնում եմ ձեզ, սիրելի մայրեր, եթե անհարժեշտություն լինի, երկրապահը նորից կանգնելու է առաջին գծում, պաշտպանելու է մեր մայրերին, կանանց, պետական սահմանն ու պետությունը, Արցախի անվտանգությունն ու անկախությունը:

Սիրելի մայրեր, քույրեր

Եվս մեկ անգամ շնորհավորում եմ ձեզ եւ ցանկանում խաղաղ երկինք, առողջություն ու ընտանեական երջանկություն:

ՀՀ ԵԿՄ վարչության նախագահ, Արցախի հերոս, գեներալ–լեյտենանտ Մանվել Գրիգորյան