Ինչպե՞ս են քաղաքական գործիչները նշում Ապրիլի 7-ը

Ապրիլի 7-ը Հայաստանում հռչակված է Մայրության ու Գեղեցկության տոն: Լուրեր.com-ը կին քաղաքական գործիչներից փորձեց ճշտել, թե ինչպես են նշում տոնը և ինչ նվերներ են սիրում ստանալ:

ԱԺ պատգամավորի թեկնածու, լրագրող Գոհար Վեզիրյանը, մեզ հետ զրույցում շնորհավորելով կանանց և աղջիկների գեղեցկության և մայրության տոնը, ցանկացավ նրանց միշտ երջանիկ տեսնել.

«Ցանկանում եմ նրանց մի՛շտ երջանիկ տեսնեմ, մի՛շտ ակտիվ, մի՛շտ կանգնած իրենց պետության հիմնախնդիրների կողքին և պայքարի առաջին շարքերում»:

Իսկ թե «ինչպե՞ս է պատրաստվում Գոհար Վեզիրյանը նշել Ապրիլի 7-ը» հարցին նա պատասխանեց.

«Վաղվանից սկսվում է նախընտրական քարոզարշավը, այսօր շտաբերում վերջին նախապատրաստական աշխատանքներն են կատարվում, բուկլետների և պաստառների տպագրության հետ կապված վերջին խնդիրներն են հարթվում, որպեսզի վաղվանից լայնամասշտաբ սկսվի մեր քարոզարշավը: Վաղը առավոտից տարբեր համայքներում հանդիպումներ ենք ունենալու բնակիչների հետ: Այնպես որ խիստ ծանրաբեռնված աշխատանքային գրաֆիկ է, բայց զանգահարում շնորհավորում են, և ինձ հիշեցնում են, որ այսօր գարնանային ամենագեղեցիկ տոներից մեկն է»:

ԲՀԿ պատգամավոր Նաիրա Զոհրաբյանն էլ նշեց, որ գտնվում է նախընտրական շտաբում:

«Մեր վերջնական շտկումներն ենք անում մեկնարկի մեր վաղվա ծրագրում: Այնպես որ, որևէ արտառոց փոփոխություն մեր ամենօրյա աշխատանքային գրաֆիկում տեղի չի ունեցել: Ընդհանրապես այնպես է ստացվում, որ ինձ համար տոնը և աշխատանքը դժվար է տարանջատել, բացի իհարկե Նոր տարուց»:

Խոսելով նվերների մասին՝ Զոհրաբյանն ասաց, որ ստանում է ծաղիկներ, որոնք թերևս իր համար ամենահաճելի նվերներն են: Պատգամավորը նշեց, որ Ապրիլի 7-ին հատուկ չի պատրաստվում, և հավելեց, որ թե՛ Մարտի 8-ը, և թե՛ Ապրիլի 7-ը, այդ երկու օրերն էլ իր համար հատուկ սիմվոլներ չունեն: Զոհրաբյանի խոսքերով կնոջը պետք է գնահատել միշտ:

«Պետք է կնոջը գնահատել, պետք է լավ վերաբերվել, ոչ թե ինչ-որ ձևականորեն սահմանված մեկամսյակի ընթացքում, այլ՝ միշտ, քանի որ հայ կինը իրապես արժանի է այդ մեծարանքին և գնահատականին: Ցանկանում եմ, որ հայ կինը մի՛շտ լինի հարգված, մի՛շտ լինի սիրված: Հայ կինը շատ բացառիկ է իր ինտելեկտով, իր աշխատասիրությամբ: Ես ցանկանում եմ, որ հայ կինը հարգի և գնահատի ինքն իրեն, որովհետև երբ դու գիտես քո արժեքը, երբ ինքդ քեզ գնահատում ես, կարող ես ակնկալել, որ դիմացինդ ևս քեզ կվերաբերի այդ կերպ»,-ասաց Զոհրաբյանը:

«Ժառանգության» պատգամավոր Անահիտ Բախշյանն էլ նշեց, որ նախընտրական պայքարը իր ամբողջ ուշադրությունը, ժամանակը ինչպես նաև ֆինանսական միջոցները խլել է իրենից ու ինքը ոչ մեկին, ոչ մի նվեր չի պատրաստել այս անգամ:

«Ես ստացել եմ նվերներ, բայց ինքս չեմ պատրաստել: Թոռնիկիցս օծանելիք եմ ստացել, փեսաներս ինձ ջերմ համբուրել են, շնորհավորել, աղջիկներս էլ նվերներ տվել»,-ասաց Բախշյանը:

Քանի որ վաղը նաև Ավետման Տոնն է տիկին Բախշյանը, շնորհավորելով կանաց, աղջիկներին, մայրերին և քույրերին, ցանկացավ, որ բոլոր հայ աղջիկներին, մայրերին Գաբրիել հրեշտակը Ավետում բերի:

«Ուզում եմ, որ բոլոր հայ աղջիկներին, մայրերին Գաբրիել հրեշտակը Ավետում բերի, բոլորը վայելեն և՛ այդ հաճույքը, և՛ ստանձնեն պատասխանատվությունը՝ մայրանալու, լինեն առողջ, երջանիկ, ինքնաբավարարված, գնահատված, իրենք իրենց շատ գնահատեն, դա շատ կարևոր բան է, երբ մարդն ինքն իրեն գնահատում է»,-եզրափակեց Բախշյանը:

«Ժառանգություն» կուսակցության պատգամավոր Զարուհի Փոստանջյանն էլ նշեց, որ իր համար լավագույն նվերը և՛ ստանալու, և՛ նվիրելու համար ծաղիկներն են:

«Այս տոնն ինձ համար ավելի է գեղեցկացնում փոքրիկիս ծննդյան օրը: Վաղը նրա ծննդյան օրն է, այսօր արդեն պատրաստվում ենք: Շնորհավորելով կանանց այս տոնի առթիվ՝ ես ցանկանում եմ, որ նրանք երջանիկ լինեն, ամուսնանան, մայրանան, մեր ազգին շատ երեխաներ պարգևեն: Մարդկային ռեսուրսը շատ կարևոր է: Մարդիկ բացակայում են Հայաստանից: Ցանկանում եմ կանանց համար լավ ընտանիք, իրենց աշխատանքի մեջ լինեն գնահատված»,-ասաց Փոստանջյանը:

ՍԴՀԿ ատենապետ Լյուդմիլա Սարգսյանն էլ նշեց, որ սիրում է նվերներ և՛ստանալ, և՛ նվիրել:

«Մարտի 8-ից Ապրիլի 7-ը՝ այդ միամսյակը, կարծես թե ծանր է տղամարդկանց համար: Տղամարդիկ սովորաբար Մարտի 8-ը հիշում են, Ապրիլի 7-ը՝ աշխատում մոռանալ, և լուռ միամսյակի փակումը անել: Շնորհավորելով կանանց՝ ես կցանկանայի, որ մեր կանայք և աղջիկները միշտ գեղեցիկ լինեն, սեփական «ես»-ն ունենան, որովհետև գեղեցիկ են, երբ ես ունեն, իրենց սկզբունքներն ունեն և կարողանում են, այդ սկզբունքներով առաջնորդվեն, կցանկանայի շատ զավակներ ունենային և երջանիկ լինեին իրենց զավակներով:

Գայանե Համբարձումյան