ՕԵԿ հանրահավաքը քարոզարշավ չէ՞ր (տեսանյութ)

«Օրինաց Երկիր» կուսակցության այսօր տեղի ունեցած հանրահավաքը, պարզվում է, նվիրված էր կանանց տոնին և կազմակերպվել էր ապրիլի 7–ի առիթով։ Նշենք, սակայն, որ կանանց տոնի առթիվ անցկացվող հանրահավաքում ելույթ ունեցողները միայն մի քանի բառով էին հիշատակում այդ, իսկ ելույթի մնացած հատվածը նվիրվում էր ՕԵԿ–ի հաղթանակի նկատմամբ վստահություն և իրենց քվե տալու հորդորներին։ 

Հանրահավաքի ընթացքում կուսակցության նախագահ Արթուր Բաղդասարյանը ևս մեկ անգամ հիշեցրեց, որ «ՕԵԿ–ը լույսի պես մաքուր է» և իր գոյության 15 տարում ապացուցել է դա։ Ըստ Բաղդասարյանի՝ քարոզարշավի օրերին իրենք ավելի մանրամասն կներկայացնեն այս տարիների իրենց կատարած գործերը։

Կուսակցության հանրահավաքն ավարտվեց հրավառությամբ, որից հետո կուսակցության անդամները նույնքան հանդիսավոր հեռացան «Ազատության» հրապարակից, ինչպես որ եկել էին՝ երիտասարդ ՕԵԿ–ականների շարքերի միջով։

Լուրեր.com-ի թղթակիցը փորձեց կուսակցության խմբակցության ղեկավար Հեղինե Բիշարյանից ճշտել, թե ինպե՞ս ինքը կարող է բացատրել քարոզարշավի պաշտոնական մեկնարկից առաջ հանրահավաք անցկացնելը, որն ունի ակնհայտ քարոզչական բնույթ, մինչդեռ քարոզարշավը պաշտոնապես մեկնարկելու էր ապրիլի 8–ին։ Տիկին Բիշարյանը, սակայն, արագ հեռացավ իր կուսակից ընկերների հետ՝ հետևելով կուսակցության նախագահի՝ հարցերին չպատասխանելու օրինակին։ 

«Օրինաց երկրի» երիտասարդ անդամներից Արթուր Միսակյանը, ով զբաղեցնում է ՕԵԿ համամասնական ցուցակի 17–րդ հորիզոնականը, Լուրեր.com–ի հետ զրույցում նշեց, որ այս հանրահավաքը ոչ միայն նվիրված էր կանանց տոնին, այլև՝ պետք է տարբեր մարզերից Երևան բերված ՕԵԿ–ականների ներկայացներ կուսակցության անելիքները։

Ի դեպ, նշենք, որ Օպերայի հարևանությամբ՝ Սայաթ–Նովա փողոցի ողջ երկայնքով կանգնած էին ՕԵԿ ավտոբուսները, որոնցով մարդկանց տարբեր մարզերից բերել էին Երևան՝ կուսակցության հանրահավաքին։