Փորձենք խոսել այն Հայաստանի մասին, որն անտեսանելի է թվում, բայց որը կա. ՀՀԿ նախընտրական հոլովակ

Երեկ՝ ապրիլի 8-ին մեկնարկել է ԱԺ ընտրությունների նախընտրական քարոզարշավը և ընտրություններին մասնակցող գրեթե բոլոր ուժերն արդեն իսկ հանրությանն են ներկայացրել իրենց տեսահոլովակները:

Հայաստանի Հանրապետական կուսակցության նախընտրական տեսահոլովակում մասնավորապես ներկայացվում է հետևյալը. «Հայաստանի ճանապարհը երբեք էլ հարթ չի եղել: Մշտապես պատերազմներ՝ մեր կամ ուրիշի, լինել-չլինելու վտանգ և կռիվ՝ հանուն գոյության և զարգացման: Այսօր էլ, մեզանից յուրաքանչյուրի համար խնդիրների ու հոգսերի պակաս չկա. մենք սիրում ենք կենտրոնանալ մեր կյանքի ծանրությունների վրա և խոսում ենք երկրի մասին: Բոլորս ենք նույն կերպ վարվում և հաճախ հասնում ենք «Երկիրը՝ երկիր չի» վերջնակետին: Մեկ անգամ եկե՛ք այլ կերպ վարվենք, փորձենք խոսել այն Հայաստանի մասին, որն անտեսանելի է թվում, բայց որը կա. այն ստեղծագործ Հայաստանի մասին, այն հպարտ, հնարամիտ ու լուծումներ գտնող Հայաստանի մասին, որն ի վիճակի է պաշտպանվել և արարել: Խոսենք ներսի լույսը վառ պահող Հայաստանի մասին ու կպարզենք, որ իրականում խոսում ենք ինքներս մեր մասին: Հավատա՛նք, որ փոխենք»։