Եթե չլինեն գարին, մուրաբան, ամեն ինչ այլ կլինի. Արամ Սարգսյան

««Ես պարտավորվում եմ կեղծիքներ չանել»՝ միասնական շտաբ ստեղծելու փոխարեն պետք է ստորագրել այս նախադասության տակ»,-այս մասին այսօր լրագրողների հետ հանդիպմանը հայտարարեց Հայաստանի դեմոկրատական կուսակցության նախագահ Արամ Գասպարի Սարգսյանը և հավելեց, որ իրենք ընտրությունները կվերահսկեն այնքան, որքան կբավարարեն իրենց ռեսուրսները:

«Դա միայնակ ոչ մի կուսակցություն չի կարող անել: Դա բոլորիս միասնական խնդիրն է»,-ասաց նա:

Խոսելով առաջիկա ԱԺ ընտրություններում Դեմկուսի իրական հնարավորությունների մասին՝ Արամ Սարգսյանն ասաց, որ եթե չլինեն «եթե»–ները, Դեմկուսը 10% ձայն կհավաքի:

Արամ Սարգսյանը հավելեց նաև, որ իրենք եկել են իրենց ծրագրով և ուզում են փոխել, հետևաբար իրենք պայքարում են թե՛ իշխող կուսակցության, թե՛ նախորդների դեմ.

«Այսօր միմյանց դեմ են պայքարոմ երեք նախագահները՝ երկրորդը՝ երրորդի դեմ, առաջինն ու երրորդը՝ երկրորդի դեմ: Իսկ մենք երբևիցե խոստումներ չենք տվել ու չենք խաբել: Հիմա մենք եկել ենք ծրագրով ու առաջարկում ենք փոխել: Նշանակում է՝ ես պայքարում եմ թե՛ իշխող կուսակցության դեմ, թե՛ նախորդների»,-ասաց նա և հավելեց, որ եթե չլինեն գարին, մուրաբան, ամեն ինչ այլ կլինի:

Արամ Սարգսյանը նշեց նաև, որ Հայաստանի դեմոկրատական կուսակցությունն իր քարոզարշավը սկսելու է վաղը՝ Պատանի հանդիսատեսի թատրոնում, որտեղ էլ հանդիպելու է իր ընտրողների հետ և ներկայացնելու նախընտրական ծրագիրը: Կուսակցության կարգախոսն է «Ես՝ մենք ենք. հաղթենք միասին»: