Մենք ասում ենք ո՛չ կեղծ բարեգործությանը. Րաֆֆի Հովհաննիսյան (տեսանյութ)

Այսօր «Արմենիա Մարիոթ» հյուրանոցում «Ժառանգություն» կուսակցության քարոզարշավի մեկնարկին նվիրված միջոցառման ժամանակ կուսակցության առաջնորդ Րաֆֆի Հովհաննիսյանը, պատասխանելով Լուրեր.com–ի այն հարցին, թե ինչ քայլեր է պատրաստվում անել կուսակցությունը՝ ազատ և արդար ընտրություններ ապահովվելու համար, ասաց. «Մենք լինելու ենք ամենուր, մենք լինելու ենք յուրաքանչյուր հրապարակում, ընտրատեղամասում, թե՛ վստահված անձերի, թե՛ կամավորների և թե՛ սրտացավ կամավորների միջոցով, ովքեր այս անգամ պետք է դուրս գան իրենց հանրապետությունից, ճակատագրապաշտությունից։ Քաղաքում և գյուղում ասելու եմ՝ ո՛չ ողորմությանը, կաշառքին, այլ այո՝ ի՛մ իրավունքի, ի՛մ աշխատանքի և ի՛մ քվեի պաշտպանմանը։ Իսկ «Ժառանգություն»–ը դա պահելու է ժողովուրդի լայն զանգվածների զորակցությամբ»։

Րաֆֆի Հովհաննիսյանն «Ժառանգության» քարոզչական հոլովակում կոչ է անում ո՛չ ասել մուրաբաներին, ինչի կապակցությամբ մեր՝ «արդյոք սա հաղորդագրությո՞ւն է՝ ուղղված «Օրինաց երկիր» կուսակցությանը» հարցին ի պատասխան Հովհաննիսյանն ասաց. «Մենք ասում ենք ո՛չ մուրաբաներին, ո՛չ պարարտանյութերին, ո՛չ թունաքիմիկատներին, մենք ասում ենք ո՛չ կեղծ բարեգործությանը, ո՛չ առաքվող բժիշկներին, ովքեր պետք է ուղարկվեն ոչ թե այս կամ այն կուսակցության, այլ պետության պարտականության շրջանակներում։ Ուղղակի, թե անուղղակի բոլոր քաղաքական բարեգործություններին դեմ ենք։ Կարևոր չէ, թե ով է անում, եթե բոլորն են անում՝ մեզանից բացի՝ բոլորին է վերաբերում։ Հիմա արդեն ժամացույցն աշխատում է. հսկողության տակ են բոլորը։ Եթե որևէ մեկի կողմնակիցը թույլ տա վրիպում, օրենքի խախտում, ընտրակաշառք, որևէ բանի բաժանում և ինքը չպատժի իր զորակցին, այդ դեպքում կարող ենք արձանագրել, որ ընտրություններն ազատ ու արդար տեղի չեն ունենալու»։