Օրենքով տրված բոլոր հնարավոր ձևերով պաշտպանելու ենք այդ քվեն. Անահիտ Բախշյան (տեսանյութ)

Այսօր «Ժառանգություն» կուսակցության քարոզարշավի մեկնարկին նվիրված միջոցառման ժամանակ, «Ժառանգություն» խմբակցության պատգամավոր Անահիտ Բախշյանն իր ելույթում նշեց, որ իրենք ամեն կերպ պաշտպանելու են յուրաքանչյուր ընտրողի քվեն։

Լուրեր.com–ի հետ զրույցում Անահիտ Բախշյանը, անդրադառնալով իր ելույթի այդ հատվածին, ասաց. «Օրենքով տրված բոլոր հնարավոր ձևերով պաշտպանելու ենք այդ քվեն։ Դրանք հանձնաժողովի անդամներն են, վստահված անձերն են, տեսանկարահանելու հնարավորություններն են և իհարկե քարոզարշավը, որի ժամանակ փորձելու ենք մեր քաղաքացիներին ամեն կերպ համոզել՝ չգնալ փորձության»։

Նշենք նաև, որ Բախշյանը կուսակցության իրական մրցակից է համարում բոլոր քաղաքական ուժերին։ Թիվ 12 ընտրատարածքում մեծամասնական ընտրակարգով առաջադրված Անահիտ Բախշյանը իրեն մրցակից է համարում բոլոր առաջադրված թեկնածուներին։ Ժառանգական պատգամավորն իր ելույթում նշել էր նաև, որ ինքը գալիս է բոլորի համար որակյալ կրթություն ապահովելու նպատակով և հարցին՝ «ինչպե՞ս է պատրաստվում անել դա», Անահիտ Բախշյանն ասաց. «Ապրիլի 5–ին Ազգային Ժողովի կրթության մշտական հանձնաժողովի նիստը քննարկեց «Հանրակրթության մասին» օրենքում նոր փոփոխությունները, որի հեղինակն է կառավարությունը և Անահիտ Բախշյանը, և այդ օրենքը հայտարարում է Հայաստանում համընդհանուր կրթության քաղաքականություն։ Յուրաքանչյուր երեխայի՝ իր հնարավորությունների, իր կարիքների վրա տալ նրա կրթությունը։ Այսինքն՝ որակյալ կրթությունը դա այն չէ, որ բոլորը մաթեմատիկոսները գիտնականներ են դառնում. որակյալ կրթություն նշանակում է յուրաքանչյուրի հնարավորությունների առավելագույն սահմանների չափով նրան կրթել, որպեսզի ինքը կարողանա ինքնադրսևորվել, և այն բոլոր երազանքները, որոնք ինքը ունի, իրականացնել իր կրթությամբ»։