ՀՅԴ ծրագիրը շատ ճիշտ է մշակված. Վարդան Բոստանջյան

«Դրանք միայն կարծիքներ են»,-Լուրեր.com-ի հետ զրույցում ասաց ԲՀԿ պատգամավոր Վարդան Բոստանջյանը՝ մեկնաբանելով շրջանառվող լուրերը, թե առաջիկայում ինքը կանդամակցի ՀՅԴ-ին:

«Ես դեռ 5 օր առաջ հրավիրված եմ եղել ՀՅԴ-ի նախընտրական ծրագրի ներկայացմանը, այսօր ես պարզապես իմ կարծիքն եմ հայտնել»,-ասաց Բոստանջյանը:

Հիշեցնենք, որ Բոստանջյանը այսօր ՀՅԴ-ի նախընտրական ծրագրի ներկայացման ընթացքում իր անձնական համակրանքն արտահայտեց Դաշնակցության հանդեպ:

«Գերի չդառնամ անձնական համակրանքներին՝ այնքան գովեմ Դաշնակցությանը, որ ուրիշները դրանից հուզվեն, բայց տոտալ մերժվածության պայմաններում ո՞վ մոբիլիզացրեց ուժերը, որպեսզի դուրս գանք ճղճիմ վիճակից, այդ ո՞վ ստեղծեց պետականությունը, այդ ո՞ր կուսակցությունն է, որ մեր իրականություն մտցրեց գրագիտություն և հայրենասիրություն»,-նշել էր Վարդան Բոստանջյանը:

Մեզ հետ զրույցում Բոստանջյանն ասաց, որ ՀՅԴ նախընտրական ծրագիրը գնահատում է բավական բարձր և նկատեց նաև, որ մեր իրականությունում կան շատ մարդիկ, ովքեր ՀՅԴ-ի կողմնակիցներն են:

Բոստանջյանի խոսքերով ՀՅԴ ծրագիրը շատ ճիշտ է մշակված: ԲՀԿ պատգամավորը նշեց նաև, որ ՀՅԴ նախընտրական ծրագրում նշված կետերը իրատեսական են:

Ըստ ՀՅԴ նախընտրական ծրագրի յուրաքանչյուր թոշակառու պետք է ստանա միջինը 63.000 դրամ, ներկայիս 31.250 դրամի փոխարեն: Հանրային ծառայողների համար ՀՅԴ նախընտրական ծրագրով սահմանվել է բազային միասնական դրույքաչափ 76 հազար դրամ՝ ներկայիս 40 հազարի փոխարեն, ստեղծել 200 հազար նոր աշխատատեղեր:

«Այն ամենը ինչ արտացոլված էր ՀՅԴ նախընտրական ծրագրում, դրանք ունեն հիմքեր և համապատասխան միջոցառումներ կատարելու դեպքում շատ հնարավոր է իրագործվեն»,-ասաց Վարդան Բոստանջյանը:

Հարցին, թե «առաջիկա ԱԺ ընտրություններում հնարավո՞ր է Ձեր ձայնը տաք ՀՅԴ-ին» Բոստանջյանն ասաց.

«Ես «Բարգավաճ Հայաստան» կուսակցության անդամ եմ»: