«Ժողովուրդ». Հանրապետական կուսակցությունը ձու է բաժանել, որոնք ժամկետանց են եղել

«Ժողովուրդ»-ի խմբագրություն զանգահարած մի կին տեղեկացրել է, որ Սուրբ Զատկի տոնի կապակցությամբ Հանրապետական կուսակցությունն իրեն 30 հատ ձու են տվել, որոնք ժամկետանց են եղել: Տիկինը նշել է, որ ձուն կերել ու թունավորվել է: Ձվի վրա գրված է եղել, որ այն արտադրվել է սույն թվականի փետրվարի 1-ին. «Գիշերով՝ ժամը 10-ին, կանչել են շտաբ, սկզբում ասեցին՝ դու «Փարոս»-ի անդամ ես, ասեցի հա, ասեցին՝ արի, ձու ստացի: Վերցրել են պասպորտիս կոպիան ու գնացել, ես էլ չգիտեի, որ էտի ՀՀԿ-ի շտաբն ւս... պասպորտիս տվյալները գրեցին, 30 հատ ձու տվեցին»:

Տիկինը նշել է, որ իրեն կանչել են 6/27 ընտրատարածքից, որը գտնվում է 16 թաղամասի 39 շենքի տակ: Թերթի զրուցակիցը տեղեկացրել է նաև, որ իրենց շենքում մի քանի մահացածների անուն կա ընդգրկված նախընտրական ցուցակում. «16 թաղամասի 43 շենքի 91 բնակարանի Ավակիմով Սեյրան Մեղրիի, որը մահացել ա 2009 թվականին, բայց ցուցակում կա, ու մեկ էլ 59 բնակարանի Դուրգարյան Սուրեն Շահենի, որը մահացել Է 2010 թվականին ու էլի ցուցակում կա»: