«Առավոտ». Բոստանջյանի պատճառով կվատանա՞ն ՀՅԴ-ԲՀԿ հարաբերությունները

«Վարդան Բոստանջյանը կարողանում է գտնել ճշմարտությունը՝ այս կամ այն մոտեցումների: Հիմա տվյալ դեպքում Բոստանջյանը գտավ, որ Դաշնակցության առաջ քաշած մոտեցումները համահունչ են իր պատկերացումներին, որոնց մասին, ի դեպ, նա բազմիցս պառլամենտի դահլիճում արտահայտել է: Միշտ էլ եղել է համակրանքը: Ես շատ ուրախ եմ, որ պարոն Բոստանջյանն այդ մասին հրապարակավ ասաց: Նախընտրական այս օրով նա իր ջերմ աջակցությունը հայտնեց Դաշնակցությանը»,-«Առավոտ»-ի հետ զրույցում ՀՅԴ պատգամավոր Արծվիկ Մինասյանը այսպես պատասխանեց, թերթի այն հարցին, թե Վարդան Բոստանջյանի ելույթն անակնկալ չէ՞ր ձեզ համար: Մենք նաև փորձեցինք ճշտել հնարավո՞ր է դրանից ԲՀԿ-ի հետ ձեր հարաբերությունները վատանան՝ նա պատասխանեց. «Մենք որևէ նման ցանկություն կամ տրամադրություն չունենք որևէ մեկի հետ մեր հարաբերությունը լավացնելու կամ վատացնելու: Մեր գլխավոր խնդիրը հասարակությանը համախմբելն ու մոբիլիզացնելն է, և եթե Բոստանջյանի նման հեղինակավոր մարդը դրական է արտահայտվում, մենք վստահ ենք, որ դրան կհետևեն նաև շատերը»:

Պատրա՞ստ է ՀՅԴ-ն ընդունել Վարդան Բոստանջյանին իր շարքերում, պարոն Մինասյանը պատասխանեց՝ պարտադիր չէ, որ նա անպայման դաշնակցական լինի. «Մեծ ձեռքբերումներից մեկը մեր համակիրների մեծ զանգվածն է, այսինքն՝ Դաշնակցությունն ունի ընդամենը 6-7 հազարին մոտ անդամ, բայց ստանում է 180 հազար քաղաքացիների աջակցություն: Սա նշանակում է, որ մեր ուժը մեր համակիրների մեջ է: Կարևորը, որ նա կիսի մեր գաղափարախոսությունը, ընդունի այն և պատրաստ լինի այդ գաղափարախոսության, ծրագրերի ներքո ինքն էլ մասնակցություն ունենալ կատարմանը»: