«Չորրոդ ինքնիշխանություն». Մենք բացակաների ցուցակներն ենք ուզում, ոչ թե ասում ենք բացականերին հանեք ցուցակներից. Գագիկ Ջհանգիրյան

Երեկ Ծաղկաձորում Երևանի պետական համալսարանի ուսանողների հետ ունեցած հանդիպման ժամանակ Սերժ Սարգսյանը անդրադարձել է ընտրացուցակներում Հայաստանից բացակայող մարդկանց ընդգրկման հարցին և հայտարարել է, որ երկրից բացակայելը հիմք չէ ընտրացուցակից մարդուն հանելու համար, և դա է պատճառը, որ ընտրացուցակում քաղաքացիների թիվն ավելանում է:

«Ընտրացուցակում ընդգրկվել նաև դեռևս չի նշանակում մասնակցել ընտրություններին: Ես կարծում եմ, որ բոլոր նրանք, ովքեր խոսում են միտում ունենալու մասին, կարող են համբերել և ընտրություններից հետո տեսնել: Մենք գնացել ենք աննախադեպ քայլերի, որպեսզի վստահության մթնոլորտ լինի. մենք ընտրողների ցուցակը տեղադրել ենք համացանցում: Յուրաքանչյուր մարդ կարող է ունենալ բոլոր ընտրողների ցուցակը: Ովքեր կասկածներ ունեն, թող հանեն այդ ցուցակները, հուշեն, օգնեն, որպեսզի բարեփոխենք, ճշգրտենք, ճշգրտված ցուցակներ լինեն ընտրությունների նախօրյակին», - ասել է Սարգսյանը' հավելելով, թե էլ «ի՞նչ պետք է անել, որ վստահություն լինի»: Սարգսյանը հայտարարել է նաև, թե ցուցակները պետք է այդպիսին լինեն' գնալով ավելանան, և դա միանշանակ է: «Եթե մարդիկ ցանկանան գալ և մասնակցել ընտրություններին, նրանց ինչ ասենք, ասենք, քանի որ դուք երկրից բացակայել եք, ձեզ զրկում ենք ընտրության իրավունքից:...Մենք պետք է վարվենք օրենքի տառին համապատասխան, ինչպես և վարվում ենք», - ասել է Սարգսյանը:

Հայ ազգային կոնգրեսի իրավական աջակցության կենտրոնի համակարգող, Գլխավոր դատախազի նախկին տեղակալ Գագիկ Ջհանգիրյանը, սակայն, երեկ «ՉԻ»-ի հետ զրույցում մեկնաբանելով Սերժ Սարգսյանի հայտարարությունը' նշեց. «Որևէ մեկը չի ասել բացկաները չպետք է ընդգրկված լինեն ցուցակում»:

Ջհանգիրյանը հիշեցրեց, որ երեք քաղաքական ուժերի' Կոնգերսի, ՀՅԴ-ի և Ժառանգության կողմից ոստիկանապետին և վարչապետին ուղարկված նամակում իրենք պահանջել են ոչ թե այդ անձանց հանել ցուցակներից, այլ հրապարակել երկրից բացակայողների տվյալները' ըստ տեղամասերի, որպեսզի վերջիններիս փոխարեն կրկնակի կամ եռակի քվեարկություներ չլինեն: Ջհանգիրյանը հավելեց, որ իշխանություններն այդ տվյալները ունեն: Իսկ ոստիկանության պատասխանը, թե իրենք չունեն նման տվյալներ, Ջհանգիրյանին արժանահավատ չեն թվում: Նրա խոսքերով, այդ դեպքում անհասկանալի են պաշտոնապես հրապարակված այն տվյալները, որ ՀՀ բնակչությունը կազմում է 3.2 մլն մարդ, որից 2.8 մլն-ը ապրում է Հայաստանում: «Այդ դեպքում սա որտեղից գիտեն», - արձագանքեց Ջհանգիրյանը: