Սիրիական բանակը նահանջել է Էրիհա քաղաքից

Սիրիական բանակն իր ստորաբաժանումներին հանել է Իդլիբի նահանգի Էրիհա քաղաքից, և այն հայտնվել է «Ջեյշ ալ Ֆաթհ» ծայրահեղական խմբավորման ձեռքում:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, քաղաքը սիրիական բանակի վերջին մեծ հենակետն էր Իդլիբի նահանգում:

Վերջին մի քանի ամիսներին ահաբեկիչներին հաջողվել է գրավել Իդլիբի նահանգի մի շարք բնակեցված վայրեր: Մարտի վերջին ապստամբների ձեռքում է հայտնվել նաև Իդլիբ քաղաքը, իսկ ապրիլին' Ջիսր աշ Շուղուր քաղաքը:

Սիրիական ՍԱՆԱ գործակալության տեղեկացմամբ, սիրիական բանակը Թադմուր (Պալմիրա) հնագույն քաղաքից Հոմս տանող ճանապարհին պայթուցիկ սարքավորումներ է վնասազերծել, որոնք տեղադրել էին «Իսլամական պետության» ահաբեկիչները: Ընդհանուր առմամբ վնասազերծվել է 18 պայթուցիկ սարքավորում, որոնցից յուրաքանչյուրը կշռում էր 10-15 կգ:

Սիրիական բանակը Դեր Զորի ռազմական օդանավակայանի մերձակայքում, Ջաբալիա և Սինաա թաղամասերում ԻՊ-ի թաքստոցներ է ոչնչացրել: Արդյունքում տասնյակ ահաբեկիչներ են սպանվել ու վիրավորվել, ոչնչացվել են նրանց պատկանող մեծ քանակությամբ զենքերը:

Ավելի վաղ՝ մայիսի 24-ին, բանակն ազգային պաշտպանական ջոկատների հետ վերահսկողություն էր հաստատել օդանվակայանի մի քանի կետերի վրա: