Մերսինում խուզարկել են գյուլենական ոստիկանների տները

Գյուլենականների դեմ պայքարի շրջանակում Թուրքիայում իրավապահ մարմինները շարունակում են տարատեսակ գործողություններ իրականացնել:

Ինչպես հաղորդում է «Արմենպրես»-ը' վկայակոչելով թուրքական TRT լրատվականը, Մերսինում և այլ քաղաքներում «զուգահեռ պետության» գործով ոստիկանական աշխատակիցները խուզարկություն են անցկացրել իրավապահ մարմինների բարձրաստիճան պաշտոնյաների տներում:

Իրականացվող հետաքննության արդյունքում եղել է շուրջ 40 բարձրաստիճան ոստիկանի ձերբակալելու որոշում: Թե քանիսն են ձերբակալվել, դեռևս հայտնի չէ: Խուզարկության արդյունքում բոլոր ձերբակալվածները բերվել են Մերսին:

73-ամյա Ֆաթուլլահ Գյուլենը նախկինում եղել է Էրդողանի մերձավոր կողմնակիցը և Թուրքիայի ներկայիս նախագահին օգնել է իշխանության գալ: Էրդողանը Գյուլենին մեղադրում է պետական հեղաշրջման փորձի և բարձրաստիճան պետծառայողների հեռախոսային խոսակցությունները զանգվածաբար լսելու գործը կազմակերպելու մեջ, որոնց մի մասի վերծանումն օգտագործվել է 2013 թվականի դեկտեմբերի 17-ին Թուրքիայում Էրդողանի որդու, դստեր, փեսայի և կառավարության 4 անդամների մասնակցությամբ մեծածավալ կոռուպցիոն գործողությունների բացահայտման համար:

ԱՄՆ-ում վտարանդիության մեջ բնակվող «Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որը համարվում է նաև նուրսիստների (նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի և ժողովրդավարության համատեղելիություն: