Սիրիական բանակը Հալեպի ռազմաօդային ակադեմիայի մոտ տասնյակ ահաբեկիչների է ոչնչացրել

Սիրիական բանակը հունիսի 2-ին Հալեպի ռազմաօդային ակադեմիայի մոտ «Իսլամական պետության» տասնյակ ահաբեկիչների է ոչնչացրել, նաև ոչնչացվել են նրանց պատկանող զենքերը:

Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, բանակի ստորաբաժանումներից մեկը ԻՊ-ի թաքստոց է ոչնչացրել Հոմսի նահանգի Ջաբալ Աբու Ակաբին շրջանում:

Ռազմական աղբյուրների տեղեկացմամբ՝ սիրիական օդանավերը հունիսի 1-ին ռմբակոծել են զինյալների հավաքատեղիներն Իդլիբի և Դեր Զորի նահանգներում, որոնց հետևանքով «Ջաբհա ան Նուսրա» խմբավորման տասնյակ ահաբեկիչներ են սպանվել: Սպանվածների մեծամասնությունն արտասահմանցիներ են:

Ավելի վաղ տեղեկություններ էին ստացվել, որ Հալեպի նահանգի հյուսիսային շրջաններում ԻՊ-ի և «Ջեյշ ալ Ֆաթհ» խմբավորման միջև բախումների հետևանքով ԻՊ-ն վերահսկողություն է հաստատել Ղազալ գյուղի վրա: Բախումների արդյունքում զինված խմբավորումն ունեցել է 45, իսկ ԻՊ-ն' 30 զոհ:

Մյուս կողմից՝ միջազգային դաշինքը շարունակում է պայքարել ԻՊ-ի դեմ: Հունիսի 1-ին դաշինքի օդանավերը ռմբակոծել են Հասաքեի, Ռաքքայի և Քոբանիի մերձակայքում ԻՊ-ի դիրքերի ուղղությամբ:

Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: