Թուրք-սիրիական սահմանին մեծ թվով փախստականներ են կուտակվել

Սիրիայի սահմանամերձ շրջաններում «Իրաքի և Լևանտի իսլամական պետություն» իսլամիստական կազմակերպության գործողությունների հետևանքով մեծ թվով փախստականներ կուտակվել են Թուրքիայի սահմանին: Հավաքվածներն արդեն շուրջ մեկ շաբաթ է սպասում են սահմանի բացմանն ու թուրքական կողմն անցնելուն: Ինչպես հաղորդում է «Արմենպրես»-ը, այս մասին տեղեկացնում է թուրքական «Հաբերլեր» լրատվականը:

Սահմանամերձ գյուղերում կռիվների հետևանքով թուրք-սիրիական սահմանի մոտ են հավաքվել շուրջ 2 հազար փախստական, որոնց զգալի մասը թուրքմեններ են, ովքեր ցանկանում են անցնել թուրքական կողմը: Թուրքական սահմանին մոտ գտնվող սիրիական գյուղերից մեկի բնակիչ Մուհամմեդը նշել է, որ նախորդ ուրբաթ օրվանից իրենց գյուղը ռմբակոծվում է: «Այս պահին թուրքական գյուղերի միջև ենք մնում, ծառերի տակ, սոված-ծարավ, Սիրիայի սահմաններում: Թուրք պաշտոնյաներից ոչ ոք մեզ մոտ չի եկել, ոչ մի օգնություն չենք ստացել:

Զինվորական ակումբ գնացի, հրամանատարի հետ խոսեցի, ասացի, որ եթե մեզ ներս չեն թողնում, գոնե երեխաներին թողնեն: Ասացի, որ թեկուզ տասը երեխայի էլ ներս վերցնեն, դարձյալ գոհ կլինեմ, սակայն հրամանատարն ասաց, որ առանց նահանգապետի կարգադրության չի կարող ներս թողնել»,- պատմել է Մուհամեդը:

Սիրիայում իշխանական և հակաիշխանական ուժերի պայքարի հետևանքով, ինչպես նաև վերջին շրջանում իսլամիստ ծայրահեղականների գործողության պատճառով Սիրիայի մեծ թվով բնակիչներ տարբեր երկրներ են փախել: ՄԱԿ-ի փախստականների հարցերով հանձնաժողովի տվյալներով փախստականի կարգավիճակում է 3 միլիոն 980 հազար 623 սիրիացի: 1 միլիոն 761 հազար 486փախստական Թուրքիայում են, 1 միլիոն 183 հազար 327-ը՝ Լիբանանում, 628 հազար 160-ը՝ Հորդանանում, 249 հազար 266-ը՝ Իրաքում, 134 հազար 329-ը՝ Եգիպտոսում: