Ընտրությունների արդյունքում ձայների թիվը հասնում է աբսուրդի՝ մոտ 250 տոկոս. Ահարոն Ադիբեկյան

Այսօր սոցիոլոգ, «Սոցիոմետր» անկախ սոցիոլոգիական ՍՊԸ–ի տնօրեն Ահարոն Ադիբեկյանը լրագրողների հետ հանդիպման ժամանակ հիմնականում քննարկեց գալիք պատգամավորական ընտրությունները։ Ըստ նրա՝ սոցիոլոգիական կենտրոնները հաճախ դառնում են քննադատության թիրախ։ Սակայն ժողովուրդն աչք է փակում կուսակցությունների ներկայացուցիչների կողմից հայտարարված վարկանիշների վրա։

Օրինակ՝ Հանրապետական կուսակցությունը հավակնում է ձայների մեծամասնությանը, ԲՀԿ–ն նույնպես հանդես է եկել նման հայտարարությամբ, կոմունիստները հավակնում են հասնել 18 տոկոսի, «Դաշնակցություն»–ը հայտարարել է, որ իրենք կհավաքեն ձայների հիսուն տոկոսը։ Եթե հաշվենք բոլոր կուսակցությունների ղեկավարների նշած հավակնությունների թիվը, ստացվում է, որ ընտրությունների արդյունքում ձայների թիվը հասնում է աբսուրդի՝ մոտ երկու հարյուր հիսուն տոկոսի։ Իսկ չիրականացված խոստումներ տված քաղաքական գործիչները պետք է հրաժարական տան։

«Բոլոր կուսակցությունները հավակնում են մեծամասնության՝ այն դեպքում, որ Ազգային ժողովում կա հաշված հարյուր երեսունմեկ տեղ, բայց հինգ հաղթող չի կարող լինել բնության մեջ»,– հայտարարեց Ահարոն Ադիբեկյանը։

Ըստ անցկացված նախնական սոցիոլոգիական հարցումների մեծամասնական ձայներ հավաքելու հավանականություն ունեն Հանրապետական, «Օրինաց երկիր», «Դաշնակցություն» և ԲՀԿ կուսակցությունները։ Մյուս կուսակցություններն աշխատում են աչքաչափով։