Ձեզ պետք է Լևոն Տեր-Պետրոսյանի ստորագրությո՞ւնը. եթե պետք է՝ գնամ բերեմ. Զուրաբյանը՝ Հակոբյանին

«Ժառանգություն»-ը կմասնակցի առաջիկա ընտրությունների հանրային վերահսկողության միջկուսակցական միասնական ընտրական շտաբի աշխատանքներին այն դեպքում, եթե փաստաթուղթը ստորագրեն բոլոր չորս քաղաքական ուժերի առաջնորդները: Այս մասին «Ժառանգության» փոխնախագահ Ռուբեն Հակոբյանը հայտարարեց այսօր Քագաքագետների միությունում կազմակերպված քննարկման ժամանակ: «Իմ ստորագրությունն ուժի մեջ է պայմանով, որ փաստաթուղթը ստորագրեն առաջնորդները, իսկ եթե ոչ, «Ժառանգություն»-ը ձեռնպահ կմա»,- հայտարարեց նա:

Ռուբեն Հակոբյանի համոզմամբ՝ շտաբը բովանդակային առումով հակասում է կոալիցիայի հռչակագրին: Նրա կարծիքով՝ կոլաիցիոն ուժերն իրենց գործողություններով բացարձակ հնարավորություն չեն տալիս ազատ, արդար ընտրությունների անցկացման համար:
«Այսօր կոալիցիոն երեք ուժերը զբաղված են ժողովրդից քվեներ որսալու գործողություններով: Գավառ մեր այցելության ժամանակ պարզվեց, որ երկու կուսակցություններ անձնագրերը մեկ օր պահում են, հետո վերադարձնում, Վայոց ձորում էլ մուրաբաներ ու հեռախոսներ են բաժանում»,- ասաց նա:

Մեկնաբանելով «Ժառանգության» այն պնդումը, որ փաստաթուղթը պետք է ստորագրեն քաղաքական ուժերի առաջնորդները, ՀԱԿ համակարգող, Կոնգրեսի նախընտրական շտաբի ղեկավար Լևոն Զուրաբյանն ասաց, որ իրենց համար առնվազն անհասնակալի է այդ պահանջը:

«Մեզ համար պարզ է, որ քաղաքական ուժը բոլոր նման բանակցություններում պետք է հանդես գա որպես ամբողջություն և որպես ամբողջություն կայացնի վճիռներ: Այդպիսի վճիռ դուք կայացրել եք ու դրել եք ձեր ստորագրությունը: Թե ո՞վ կարող է ստորագրել այդ համաձայնագիրը, դա բացառապես Ժառանգության գործն է»,- ընդգծեց Զուրաբյանը և հավելեց՝ «Ձեզ պետք է Լևոն Տեր-Պետրոսյանի ստորագրությո՞ւնը. եթե պետք է՝ գնամ բերեմ»:

Ինչ վերաբերում է «Ժառանգության» այն պնդմանը, որ շտաբը բովանդակային առումով հակասում է կոալիցիայի հռչակագրին, Լևոն Զուրաբյանն ասաց. «Եթե ԲՀԿ-ի ստորագրությունը հակասում է կոալիցիոն հռչակագրին, դրա համար պետք է միայն ուրախանալ»:

Լևոն Զուրաբյանը կատարվողը «աննախադեպ վիճակ» որակեց՝ ասելով, որ տարիներ շարունակ միմյանց հետ լեզու չգտնող քաղաքական ուժերը միասնաբար ուզում են պայքարել ընտրակեղծիքների դեմ ու կոչ արեց «Ժառանգության»-ը մյուսների կուսակցությունների ոգով ու նույն եռանդով մասնակցել այս գործընթացին:

Հիշեցնենք, որ երեք քաղաքական ուժեր՝ ՀԱԿ-ը, ՀՅԴ-ն և «Ժառանգություն»–ը առաջիկա ընտրությունների հանրային վերահսկողության միջկուսակցական միասնական ընտրական շտաբ ձեւավորելու մասին հայտարարությունը ստորագրել են ապրիլի 4-ին: